دولبني زماني بيك - مكتوبة

الشاعر : المرحوم عبد الامير الفتلاوي

آيبني شگـول اعليك آيبني
دولبني زماني بيك دوليني
******
دولبني زمان بيك ياسلوه
شلون انساك ونسه أيامنه الحلوه
اشهل بلوه المثلها ما جرت بلوه
آيبني العند الموزمه ذنبي
******
تذب البيك تسعه امن الشهر شالت
اونالت من ثجيل الحمل ما نالت
أمك جابتك يمدلل او حالت
اويوم البيه صرت ياشبل شيبني
******
شيبني اصيارك والهدم حيلي
هز مهدك يشمامه او سهر ليلي
منك حرمت امك ليش ياويلي
آخر ما گلت حقها او تطالبني
******
اطلبك سهر ليلي والمنازع ذاك
اطلبك باللبن من درَّتي الغذاك
نسيت ارباك يا جاسم نسيت ارباك
يمدلل سگمني ارباك وتعبني
******
تعبني وسگمني او غير اللوني
على صدري ربيت او مر على امتوني
حسبت احساب وحسابي طلع دوني
على راسي ابيوت امشيده تبني
******
تبني البيت لامك والجعيده امك
تصاحبني وتجيب الواجب ابصمك
ريت الگبر ضمني قبل ما ضمك
الموت الموت يبني اوياك يرغبني
******
يرغبني الكبر سني او شوفي ازهيد
حيلي راح مني والجريب ابعيد
يبني من تجي الشبان يوم العيد
صار النوح يوم العيد يطربني
******
يطربني العزه والنوح بالهجري
يفي الصيف يا عذب الهوه اليسري
اخذني الكبر منحيه الضهر تدري
ابذلة كبرتي يبني تسيبني
******
تسيب امك يجاسم من بعد عدها
عين الله على العريس واحدها
تريد اتناشدك تگعد او ناشدها
تگلك باليسر منهو اليرچبني
******
يبني الفاجدات اكثرهن امخلفات
ماتدري تموت ام الولد لو مات
يبني ارباي وينه او سهر ليلي الفات
يبني ليش ماتگعد تحاچيني