تربية حيدر - مكتوبة

الشاعر: الاديب الحاج رسول محي الدين

گول بكل شهم يظهر هاذي تربية حيدر
يفدي للجهاد انحور .. يقدمها مشاعل نور
حتى الـ بالسبي وتتكفل الخدر
هاذي تربية حيدر
******
الناس ويالحياة اتسير .. ابسچة حاضر وبائد
بتكوين وفناء اتدور .. واليبگه العمل شاهد
وصفحة ذكرياته اعمال .. تتثبت لكل واحد
وعلى مقدار اهميته .. يتكون الة ناقد
يجي يرسم صور فعله .. لاناقص ولا زايد
السيء صورته مشوهة .. والصالح يضل خالد
على هالقاعدة ارسمها.. صورة حيدر وشاهد
كل دوره الذي مر بي .. عالم حاكم ايجاهد
ارسمه بكل سلوكه اشجان! .. معزول ووصي وقائد
ارسمه وياا حواريه .. ارسمه ابمنزله والد
ارسمه بتربية جيلة .. وجيل الراح والوارد
ابصوره اتخص رجل اعمال .. واقع مو نحت تمثال
بـ لسانه يگلك عالذي اتصور
هاذي تربية حيدر ..
******
ابكل شي تنضرب امثال .. ومضمون المثل برهان
عن الشخص لاتسأل .. گال اسأل عن الأقران
وگال الطبع يكتسبه .. من المصحوب كل انسان
مثل الريح اذا مرت .. على طيب ونتن ينبان
اخذ المرتضى وصحبه .. وعصابة ابن ابو سفيان
وقارن بينهم وانطي .. رايك و احكم ابوجدان
وشوف اطباع ابو الحمله .. وي صحبه و التبع للأن
وخذ طبع ابن اميه شلون .. وي اقرانه وهله من چان
الاشعث وابنه وابن العاص .. وشريح وابن آبي وقاص
وشوف الفارسي وعمار والاشتر
هاذي تربية حيدر ..
******
انرد للتربية وننظر .. هالحادث ابتحديده
الوصي لمن خليفة صار .. وصفه الراي اعله تقليده
يدري بغيره يو هي ابچان .. الخليفه هذا تعويده
ويدري عنده اخ ونسيب .. السد حاجاتها اتريده
وياهي المن عقيل اوله .. اخوه ولازم ايفيده
اجه للمرتضى ابمطلب .. اليتنافه لتقاليده
اجه يطلب قصر منه .. ابرخام امطعم ايشيده
اجا يطلب نجد والشام .. ويسود احراره وعبيده
اجاه ابطلب ملك الري .. ويتسلم مقاليده
احلف عن عقيل آنا .. مو هذا الذي ايريده
عقيل من الخليفة يريد .. صاع شعير الة ايزيده
وعلي ولاعاطفة ويه الحق .. شعاره لخصمه وعضيده
وحيدر واعده لاچن .. حما الة ابمنزله حديده
من اجه چواه ولن الكون .. يهتفله ابناشيده
علي يا امناء المال .. لعضيده چوا بيده
جعل من ايد اخو مقياس .. اذا امتدت المال الناس
تتچوه واذا عادوت تتوذر
هاذي تربية حيدر ..
******
تعال انوب اخذ نظره .. لحماي الحمه ابيته
وشوف افراد عايلته .. وعاين اثر تربيته
و رد لبيت أميه وشوف .. سلوك اهله اعله شكليته
واذكر موقفين وجود .. بكل موقف وتوقيته
موقف كربله الدامي .. و احد واعرف اهميته
ومن كل بيت اخذ حرمه .. و دور الها ارتفع صيته
زينب دورها بالطف .. وهند باحد تأديته
ياهي التفتدي الـ هالدين .. دم النبي وذريته
وياهي التهجم اعله الدين .. وتگوم اتمثل ابميته
اهنانه التربية اتبين .. وتبين الابو و نيته
هند اكلت چبد وفاد .. وزينب قدمت اكباد
ذيچه تربية حرب الفلا يطهر
هاذي تربية حيدر ...
******
رد للتربية وانظر .. اثرها ابعترة الانزع
وشوف اشأثرت بحسين .. و ليها ابفكرك اطلع
واحد طلبته دوله .. اعليه كل جيشها اتجمع
اتشوفه انوله ابقبضتها .. وتسمعه حسينها يصدع
لا اعطي بيدي ياقوم .. اعطاء الذي يخضع
گالوله يبو اليمه .. اسمع راينه واقنع
نگطع خنصر من ايدك .. و نذرك بعد نگطع
اذا ما صك الاستسلام .. بيدك هاي يتوقع
گلهم خنصري وراسي .. واديه وجسمي يتوزع
لا عيني تشوف الصك .. ولا اذني الة تسمع
ايد العززت اسلام .. ما تؤمن بالاستسلام
عاشت ايدك وتسلم يبو الأكبر
هاذي تربية حيدر ..
******
انوب لتربية عباس .. ننظرها بنظر تحليل
اشخلت بيه اثر واصبح .. مثال التضحية لكل جيل
چفوفه انگطعت ومالت .. ثبت لا الرايه اتميل
عينه من السهم سالت .. احتملها ولا الجود ايسيل
من ظهر الجواد انزال .. رضه ولا عمد خيمه يزيل
گرب للحتف گال ايهون .. ولا تگرب لخدري الخيل
اعله قبر الجندي المجهول .. اكليل انوضع تبجيل
وجندينه البطل عباس .. يستاهل الف اكليل
هالجندي سقط يمناه .. بگه يذب عن سقوط لواه
گبل البيرغ اعله المشرعه اتگنطر
هاذي تربية حيدر ..

******
گول بكل شهم يظهر هاذي تربية حيدر
يفدي للجهاد انحور .. يقدمها مشاعل نور
حتى الـ بالسبي وتتكفل الخدر
هاذي تربية حيدر