حتى لو ما عاجبك - مكتوبة

قصيدة : حته لو ما عاجبك

الشاعر : علي السّقاي

الرادود : الحاج ملا باسم الكربلائی

حته لو ما عاجبك...سيفي راح يحاسبك
******
عريس و اثياب الفرح درعي على صدري...لا تسأل اشقد العمر ساحة حرب عمري
شاب آنا و بقد كربله و بس كربله ابكبري...يم الفرات أحفر نهر مو ماي دم يجري
خلها بيني و بينك...راح أطشر اسنينك...لا تقلي بشاربك
  ******
شارط عله أهلي من الزغر لمن يزفوني...إلا أكشخ بسيف و رمح و بدم يحنوني
هلهوله أريد امن الخيم لمن يذبحوني...حب و غزل مثل الحرب ما شافت اعيوني
و المهر بالتالي...دم نحر مو غالي...بعين أمي اتراقبك
******
صاحوا إلمن هالبدر واليشبه الخاتم...هذا علي لو حيدرة لو بو الحسن قادم
قلت إلهم آنا الزلزلة و الحازم الصارم...عباس آني و الحسن و حسين و القاسم
أعصف بصولاتي...و أذبح بنظراتي...هذا صوتي ايخاطبك
******
مو شي عدد سبعين ألف ما واصل الغايه...منهم تره شسع النعل عندي أغله بهوايه
آنا ابن أخو الذل النهر و العلقمي و مايه...من إيده طاحت كربله و ما طاحت الرايه
و آنا مثل الكافل...بالحرب ما أجامل...أمشي بلغ صاحبك
******
مقياسكم جان العمر و اسنيني الزغيره...شوفوا المخالب و النسر ما يرحم الطيره
نار أنقلب من أنجرح و اتضهضب الغيره...جف إيدي ناعم بس تره جف الوغه ايديره
مو غرور اواداعتي...و المعارك مالتي...و آنا بيهن غالبك
******
لا تبجي أمي اعله النحر ما أقبل اتعاتب...بالجنة زفة من العمر رب العرش كاتب
خلوها تنظر لي السمه لو ردات اتراقب...ثاراتنه و زفتي سوه من يظهر الغايب
يالرهانك خاسره...عندي غايب ناطره...و انت ناطر غايبك