دنيا .. منين اجيب ليها صبر - مكتوبة

قصیدة : دنیه

الشاعر : السيد عبد الخالق المحنة

 الرادود : الحاج ملا باسم الكربلائي 

دنيه ما بيها بس هم غدر دنيه
ومنين اجيبلها الصبر دنيه
راوتني نجمات الظهر دنيه
******
ليلة وداعك ثواني بسرعة مرت
جانت أسرع من دمعتي
لحظة فراكَك مسافة بلا نهاية
هواي أطول من دمعتي
والعمر بالفركَة يطول يمته يخلص
حته أخلص من غربتي
دهري راوني أنواع الألم دهري
كل لحظة يرميني بسهم دهري
واعرف نهاية هالعمر دنيه
******
يبني كل الراح يرجع تدري يوسف
رد قميصه للبشارة
وآنه كلكم ضيعتكم مرة وحدة
ما اجيتوا يالغَيارة
يبني وين الكَه قميصك حته اشمه
بلكي كَلبي تطفه ناره
وينك يتارك بكَلبي رمح وينك
لو انسه يسئلني الجرح وينك
خلتني للموت انتظر دنيه
******
تدري أول كلمة اكَلك من اشوفك
يا حبيبي أحلى كلمة
تدري آخر حلم عمري الما تحقق
وينه نحرك اردَ اشمه
تدري اجمل كلمة عندي شنهي يبني
من صحتلي ها ييمه
يمه معقولة ما ترجع بعد يمه
يمه أم البنين بلا وِلد يمه
ذابحني يا سيف الهجر دنيه
******
يشهد الله ما نسيتك لحظة وَحدة
وانته دومك اعله بالي
من كثر ما بسمك الهج صرت اشكن
وانته يمي مو خيالي
أنجوي بنارك ونادي اكَرب اكَرب
يالعفتني هذا حالي
يبني أطّشر اجروح وصحت يبني
أبجي وعلى وجهي طحت يبني
بعدك ولا واحد يمر دنيه
******
تاكل بروحي الليالي واشتكيلك
يمه ارجع وينك انته
وارسم اهموم بطريقك مرة اكتب
بس تعالوا مره يمته
يا لطريقك بيه يشعر من أسئله
ما يجاوب يبجي سكته
أرجع يا لماخذ وياك الشمس أرجع
يا باجر وحلم الأمس أرجع
مجبورة أقبل أي عذر دنيه
******
آنه أدري ما تردلي بس احاول
ما اصدك فاركَتني
تالي بن حذلم اجاني وكَتله جاوب
أبني وينه عذبتني
ضل يعددلي إبنيني وفكري يمك
انته وحدك حيرتني
نوحي أبنج صريع بكربلة نوحي
مسبية كل العايلة نوحي
والشدة زينب باليسر دنيه
******
أنتظر زينب تعاود وأمشي ليها
لازم اسئل عن اخوها
عن كَمر هاشم سؤالي والكفلها
يبقى ساكت من سبوها
أبني بس غيرة وحمية وشيصبره
يمه زينب سلبوها
أختك كَتلك أمانة بركَبتك أختك
كَلبي يكَلي عذرتك أختك
عد زينب عتاب شكثر دنيه