صوت النبي - مكتوبة

قصيدة : صوت النبي
الشاعر : السيد عبد الخالق المحنه

الرادود : الحاج ملا باسم الكربلائي
المکان : ساحة الشهداء ، البصرة
المناسبة : الليالي الفاطمية ، ليلة 9 جمادى الأولى 1442

صوت النبي من الگبر
يا ابا الْحَسَن مأجور
رِدْ الأمانهْ اِلي
ما قَصرت مشكور
علي يا علي
******
واگف محمد بالگبر
و اِعله الدرب اَنظارهْ
هالليله لازم يستعد
أُم الحَسَن خطاره
هذا الجرح مو من عدو
جرحه إجه اِمن اَنصاره
وطبع الذي يحمل ثمر
لازم تصيبه اِحجاره
ما مرتدي اِعمامته
سيد البشر مقهور
وينادي وين الوفه
ليش الشرف مغدور
علي يا علي
******
ظل ينتظر واعله الجمر
متلهف يلاگيها
رِد العزيزهْ يا علي
خلي اشوف شبيها
سلمها بيده حيدره
والدمعه ما يخفيها
كله يـ طه اعتذر
لو ما گدرت احميها
صاح النبي يا علي
لا تعتذر معذور
ادري بعد غيبتي
دمكم صفى مهدور
علي يا علي
******
عندي علم باللي حصل
بس للحديث اسبابه
اعرف منو الشال الحطب
واعرف منو الحطابه
للشيعه نشرح هالألم
خاطر تعيش مصابه
خل تعرف اجروح النبي
واللي حصل بغيابه
حق التواضع شتم
من يحكم المغرور
كسروا جناح الصگر
وتجرأ المصگور
علي يا علي
******
سولف يحماي الحمه
وحچايتك مسموعه
اشرح تفاصيل القتل
رايد اعيش اللوعه
ليش ابجفن فاطم دمه
احمر شنو موضوعه
هذي اصابع عالوجه
يا ابا الْحَسَن مطبوعه
من هالاثر ينعرف
خد فاطمه مسطور
دور يـ طه بعد
تلگه ضلع مكسور
علي يا علي
******
اشرحلي عن هذا الورم
ليش اعله متن البضعه؟!
گله بسياط الطاغيه
بس هذا بعد الصفعه
گالتله لا تآذي النبي
والغايه بس تمنعه
والناصبي بأذنه صنم
صوت السمه ميسمعه
جف الظلام ارتفع
رايد يطفي النور
كلشي صرخ يا علي
المن بعد مذخور
علي يا علي
******
يا حيدر ابچف فاطمه
هذا جرح لو كسره؟!
گله الرفس بابك نذل
چف الورد مينحره
باب وجدار تلاحمن
جانت مهولهْ العصره
صوره ابجدار تعلگت
هيج اني شفت الزهره
مجتوفه اديه بحبل
و براسي دنيه ادور
وبسيفي صرخة غضب
بس عالصبر مجبور
علي يا علي
******
يا حيدره ابرغم الجره
باجر نشوف الأصعب
واهنا اكو باب احترگ
باجر مخيم يلهب
واهنا اكو كلمة و إن
باجر حرم تتسلب
باجر جثث فوك الثره
بيها الحوافر تلعب
كل التشوفه سهل
من يبتدي عاشور
چم غالي واگع عطش
يم النهر منحور