لطمية موعد عالرماح مكتوبة
الرادود باسم الكربلائي
موعد عالرماح
والطف استراح
وتْلاگو سِوه نحرِ بْنحر شَيبه اويه شَيبه
موت بلا حياة
چف بلا فرات
خُطوه بْلا أثر من كربله لشام المصيبه
روس اعله الرماح الدم ضواها
طِلعَت زينب وطلعو وراها
ايسمعون الشمر يحچي وتباهه
چَتفُو بت علي بضحكه حچاها
گاع الله استحت لمن سباها
والروس انحنت من مستحاها
كلمه اتهز جبال
چتفُوها بحبال
هذا اول جرح بعد الذبح زينب غريبه
بكل نظره سؤال
واقع لو خيال
زينب تنسبي من كربلة الشام المصيبه
روس بلا جسد وتباوعلها
هاي اول غريبه ابين اهلها
هِزله بْلايه هُودج جابو الها
الروس التفتت الراس الكفلها
وعباس بسهم عينه سألها
احبال ايدچ يزينب من يحلها
مچتوفات اديچ
وما اگدر اجيچ
چف الدللچ يا بت علي من وين اجيبه
بضعنج بس عليل
ماعندچ كفيل
مكسورة ظهر من كربله لشام المصيبه
الروس ويه الضعن للكوفه راحت
وادم لله يا حُرمه استباحت
نوگ الهزله يا ناس استراحت
وزينب واگفه ودمعتها لاحت
حسين مْن الشماته جروحه ناحت
شِتمو فاطمه ودمعاته طاحت
اشگد صعبه تطيح
دمعه من الذبيح
وصاح من النحر ما تنشتم امي الحبيبه
بيت الله الحرام
ما ينسب حرام
طاحت دمعتي من كربله لشام المصيبه
برماح وتعب بيّن عليها
الله يساعد التمشي بسبيها
تشتاگ وتجي لمنحر وليها
وترجع بالدمه متروسه اديها
من تحچي المناحر تدري بيها
بس المنسبي يفهم حچيها
حُرمه بلا أمان
حيّرها الزمان
تعثر بت علي بين الغرب والله عجيبه
تبچي بلايه صوت
بكل خطوه تموت
وشْطوله الدرب من كربله لشام المصيبه
الكوفه وكربله هيّن امُرْها
ليل الشام اجه وميّت گمرها
وَگفة زينب بسوگ شكبرها
ناس من السطح تِشمُر حجرها
ناس بلا شرف شافت خدرها
وناس تهلهل بطبة قصرها
وناس معيدين
مذبوح الحُسين
اشگد سمعت ضحك يم شيبته البالدم خضيبه
گالتله يخوي
ضحكو يبن ابوي
وانت اعله الرمح من كربله لشام المصيبه
طبيت القصر وآنه اختكم
ذيچ الساعه تبچولي شفتكم
واحد أشّر اعله اسكينه بتكم
من رادوها تخدم باوعَتكم
معذوره الدموع العاتبِتكُم
تعبتوني مدري تعبِتكُم
يا صبر اليفيد
باوعلي يزيد
وآنه الما نِظَر طُولي بَشَر واخواني هيبه
زينب كربلاء
صبراً عالبلاء
حزني ما خُلَص من كربله لشام المصيبه
يا ليل الخرابه شسوه بيه
انعادت ليلة الوحشه عليّه
راسك بالطشت جابو اليه
وي ما شافتك ماتت رقيه
يحسين ادفنت بتك بديه
ردت وياها تاخذني المنيه
ويّاك التقيت
من شفتك بچيت
چفك ما مسح دمعي وأَنه يمك قريبه
ياجرحي ودواي
ما گتلي تعاي
ومشتاگه الك من كربله لشام المصيبه
play_arrow
play_arrow
play_arrow
play_arrow
play_arrow
play_arrow
تعليقات