هاي من حيدر وصية - مكتوبة

قصیدة : هـاي  من حيدر وصيه

• الشاعر : السيد عبدالخالق المحنّه
  
• الرادود : الحاج ملا باسم الکربلائي

هـاي  من حيدر وصيه... يا أبا الفضل
******
هـاي يـا يـمه الوصيه حيدر إموصيها
قـال  لـو ودعتي إبني بالوداع إحجيها
زيـنـب الـحـره أمانه إبرقبته إمخليها
هـو  يـتـكفل خدرها إبكربله يحميها
صـول برض الغاضريه ... يا أبا الفضل
******
آنـي يـالـغالي أحبكم بالعمر أفديكم
بـس  أبو  الأكبر ييمه أغله واحد بيكم
موتوا  دون حسين يبني حيدر إموصيكم
و الـمهم زينب ييمه كون ترضه إعليكم
حـامي  ضعن  الهاشميه ... يا أبا الفضل
******
آنـي  حـق إرباي أريده طلبتي معروفه
لـلـقـيـامه بيكم أبقه هامتي مرفوعه
يـمه لو زينب تشوف إجفوفك المقطوعه
أدري يـالـغالي تعذرك إختك المفجوعه
طـيح  عالشاطي  رميه ... يا أبا الفضل
******
مـن تشيل الجود تقصد عالفرات و مايه
لا  تـرد إبـغـير جودك ظل عالمسنايه
يـبني  لو طاحت إزنودك لا تطيح الرايه
إنـت  يـا عـبـاس تحمل راية الوفايه
صـيـح و إتحده المنيه ... يا أبا الفضل
******
هالله  هالله  بالعقيله و لا تعوف إعضيدك
هو يشعر جيش عنده كون سيفك بإيدك
مـثّـل  الـكرار يبني عالشريعه إنريدك
مـن يروح حسين منك هالعمر شيفيدك
هـاي  نـفـذها  إليه ... يا أبا الفضل
******
يـبـني كل عمري قضيته أنتظر أفعالك
يبني  خل إجيوش أميه تشرد إمن إخيالك
زيـنـب  بإيدك أمانه هاي خلها إببالك
تدري بيها إشقد عزيزه و تستريح إبجالك
خـاف  تـترحل سبيه ... يا أبا الفضل