وحق نحر الشهيد اذلك يايزيد - مكتوبة

قصیدة : وحق نحر الشهید

الشاعر : وسام الشويلي

  الرادود : الحاج ملا باسم الكربلائي 

و حق نحر الشهيد ...أذلك يا يزيد
و الله ما تمحي ذكرنه إحنه آيات السماء
آنا بنت الفتح مكه و إنت إبن الطلقاء
و حق نحر الشهيد ...أذلك يا يزيد

******

آنا زينب بت علي و أقسم قسم
إبدم أخويه حسين و براعي العلم
نعم بجفوفي أطيحنك نعم
مثلما طيّح علي إبجفه الصنم
وسط قصرك أصول...مثل فحل الفحول
صوت ذو الفقار صوتي ما أعرف الإنحناء
آنا بنت الفتح مكه و إنت إبن الطلقاء
و حق نحر الشهيد ...أذلك يا يزيد

******

إشلون يبن الوثني و الجاهلي
أنحني لك و آنا زينب بت علي
اليوم صعدت بيَّ غيرة كافلي
من نخيته و قال يختي إتدللي
و حق قطع الجفوف...أسويها طفوف
مثلما رف عالشريعه إبقصرك إيرف اللواء
آنا بنت الفتح مكه و إنت إبن الطلقاء
و حق نحر الشهيد ...أذلك يا يزيد

******

شجره طيبه أهلي و آيات الشرع
آنا زينب زودي من عدهم فرع
شجرة الملعونه إنتم و إستمع
إبجف أبو فاضل أكيداً تنقلع
عداك الإختيار...إلي صار القرار
إسعه سعيك كيد كيدك ما إلك غير الفناء
آنا بنت الفتح مكه و إنت إبن الطلقاء
و حق نحر الشهيد ...أذلك يا يزيد

******

يا مثالب راح أحسب لك و أعد
غشي وجهك من يمر طاري هند
للصنم ما زلت مملوك و عبد
لا بدين و لا إبخالق تعتقد
إشتجاوب وشتقول...و أنا إلسان الرسول
آية التطهير صوتي تدري يبن الأدعياء
آنا بنت الفتح مكه و إنت إبن الطلقاء
و حق نحر الشهيد ...أذلك يا يزيد

******

حته لو يمك جبتني إميسره
ما أذل و أبقه عزيزه إمخدره
علماني الحسن أبقه صابره
أكسر إخشوم الزلم و آنا مره
أبو فاضل أخوي...أسد خيبر أبوي
حته جبريل إبعظمته يجي يسألني الدعاء
آنا بنت الفتح مكه و إنت إبن الطلقاء
و حق نحر الشهيد ...أذلك يا يزيد

******

عرشك إيطيح و فلا يوقف بعد
و أبو اليمه حسين خالد للأبد
الراي إلنه و إنت كل رايك فند
و أعرف أيامك و أحسبهن عدد
رغم كل الجروح...نهدم لك صروح
و الله إلنه مو عجيبه السمه لو مطرت دماء
آنا بنت الفتح مكه و إنت إبن الطلقاء
و حق نحر الشهيد ...أذلك يا يزيد

******

صوت زينب يبقه هو المنتصر
و آل أميه ما يظل إلهم ذكر
و الله بس توصل زمرهم للقبر
يعني للمهدي إبتدت ساعة صفر
إذا طاح الضريح...يجي المهدي يصيح
يا لثارات العقيله و يا لثار الأولياء
آنا بنت الفتح مكه و إنت إبن الطلقاء
و حق نحر الشهيد ...أذلك يا يزيد