ودعوني ودعوني يا الزكية وفارقوني - مكتوبة

الشاعر : أبو علي الناصري

ودعـونـي و دعـونـي ...يـالـزجـيـه و فـارقـونـي
جـيتج  إبون و حنيني...راح الحسين و بنيني...ودعوني و دعوني
******
جـبـت  يـم قـبـرج إجـروحـي يـبـت المصطفه طاها
آنـه الـلـي بـلا والـي الـدهـر يـالـزهـره خـلاهـا
مـشـوا  عـنـهـا و بـقـت عـالدار تجري إدموع عيناها
و إجـت يـم ضـلـعـج الـمـكـسور تشجي إهموم دنياها
و دعـتـهـم ودعـتـهـم... بـالـمـدامـع ودعـتـهم
مـا  قطع مدمعها عيني...راح الحسين و بنيني...ودعوني و دعوني
******
بـعـد  مـا غـمـضـت عـيـنـج و بنينج يالزجيه إزغار
تـحـمـلـت الأمـر وحـدي تـكـفـلـت الربه ابهالدار
فـنـيـت إسـنـيـنـي لـولادج يـبـنت المصطفه المختار
و بـعـد هـذا الـتـعـب كـلـه ضـعنهم ودعاني و سار
لـلـضـعـيـنـه  لـلـضـعـيـنه ...عيني تنظر للضعينه
و هسه جيتي إتساعديني...راح الحسين و بنيني...ودعوني و دعوني
******
هـاي الـلـي مـشـوا عـنـهـا أهـلها إتقول عني الناس
تـقـطـع قـلـبـي هـالـجلمه و أطخ امن الشماته الراس
لـو بـس الـزلـم راحـت تـظـل يـم الـنـسـه لا باس
حـتـه زيـنـب الـحـره جـفـتـنـي و رافـقت عباس
وي  كـفـيـلـي وي كـفـيلي... قالت أمشي وي كفيلي
و  آنـه  ظليت إبونيني...راح الحسين و بنيني...ودعوني و دعوني
******
عـشـت هـذا الـعـمـر كـلـه و أمل دنياي وجه حسين
صـحـيـح أولادي إعـيـونـي و حـسـين الضوه البلعين
صـحـت  لا  ويـن بـضـعـونـك خـبرني السفر لا وين
قـال  و دمـعـتـه إبـعـيـنـه يـحـره الـكربله ماشين
عـالـعـلـيـلـه عـالـعـلـيـله... خلي عينج عالعليله
إصفقت يسراي إبيميني...راح الحسين و بنيني...ودعوني و دعوني
******
جـن  صـوت الـقـبـر نـاده إبـلـسـان الحال و العبره
الـضـعـيـنـه  الـقـوضـت  بـيها تجدد عالضلع كسره
إذا ضـنـج يـرد حـسـيـن إقـطـعـي الـظـنه يالحره
الـحـزن يـم الـقـمـر عـبـاس و الـمـأسات هالسفره
إلـهـالـمـصـيـبـه إلـهـالـمـصيبه ...إستعدي إلهالمصيبه
أشد  من طيحت جنيني...راح الحسين و بنيني...ودعوني و دعوني
******
لا يـم الـبـنـيـن الـعـيـن دمـع مـحـنـتها ما يقطع
راحـت  لـلـذبـح كـلـهـا حـتـه الـبـلمهد يرضع
خـبـر لابـد يـرد لـج يـوم قـلـبـج بـيـه يـتصدع
و ضـعـن الـراح بـس أيـتـام و بـجـمـعة حرم يرجع
و الـعـقـيـلـه و الـعـقـيـلـه ...ترجع إعليج العقيله
إتنادي  قومي إستقبليني...راح الحسين و بنيني...ودعوني و دعوني
******
أم الأربـعـه صـاحـت قـلـبـي الـحـجـيـك إتفطر
يـالـزهـره أمـل عـنـدي قـبـل رجـعـتـهـم أتنطر
رضـيـتـي  الأربـعـه يـرحـون و يـسلم بس أبو الأكبر
بـعـد إلـمـن أعـيـش إلـمـن إذا كـلشي إنتهى و قوطر
يـا غـربـتـي يـا غـربـتـي... يـا حـسرتي و يا غربتي
و الـضـعن إلمن يجيني...راح الحسين و بنيني...ودعوني و دعوني