يا خالق - مكتوبة

قصيدة: يا خالق يارازق ثبّت لي قدم صدق # مکتوبه
للشاعر : ميرزا عادل أشكناني

يا خالق يا رازق ثبّت لي قدم صدق
اويه أنصار الغريب .. حسين
أتمنی بالجنة وي عابس أصير وداري
يم دار الغريب .. حسين
والضحه ابفيض ادماه...يارب تحشرني اوياه
___________
سبحانه من أوحى لآدم الأسماء
خله اللي ويه حسين ماتوا أحياء
يا مادعيتك من زرت عاشوراء
يا ربي اتبيض وجهي عند الزهراء
بهالدعوه ... والرجوه
ويه الضحوا ابدمهم أريد الزهره تشملني
أتوسل ... و اتأمل
هيه القبلت الحر الرياحي وظني تقبلني
الحر العايف دنياه ... يارب تحشرني اوياه
___________
ما أقول أنا و أنصار بفذ مقدار
ولا وصّلت يحسين عشر المعشار
او لا قلنه عابس لجن يبن الكرار
ياريت خادم أنحسب للأنصار
آنا أدري ... ياذخري
اللي يحب حجر ربك يحشره اويه الحجر باجر
و بقلبي .. كل حبي
لهلال وزهير ومسلم وهاني وإبن ظاهر
كلمن ضحه المولاه .. يارب تحشرني اوياه
___________
ياموسه دهرك بالبشر جم فرعون
جم ساحر اويه ايزيد ضدك يسعون
أنصار عند غيرك تفوق المليون
لاجن ولا وصلوا ربع عبدك جون
هالخادم .. عالوادم
أصبح سيد ودمه النزف بيه ريحة العنبر
من قده .. وبخده
حط خده الحسين وجثته يم جثة علي الأكبر
والحصّل هذا الجاه ..يارب تحشرني اوياه
___________
وهذا حبيب النال فوز الدارين
خي عون إبن ظاهر جمعهن الأثنين
اينول الشهاده ابدنيته وقرة عين
عقب الممات ايصير بواب حسين
أصحابه .. يم بابه
واجب من نسلم عالحسين انسلم اعليهم
ومن نقره .. هالفقره
يعني الله بسماءه السابعه هوه اليحيهم
واللي الصادق حيّاه...يارب تحشرني اوياه
___________
شيخ الأنصار و ياكلام اليحويه
بعمر الكهول او واهس العاشق بيه
عنه اشنقول بيوم نذكر طاريه
يكفيه زينب بت علي امسلمه اعليه
خل نسأل .. لو يحصل
ترجع ياحبيب الدنيتك منها اشتريد أكثر
رد نسمع .. لو أرجع
بس رايد أكون ابخدمته وبمجلسه أحضر
والهذا أصبح  منواه .. يارب تحشرني اوياه
___________
اتمنی حبيب اتعود بيه أيامه
يخدم حسين اردود وي خدامه
يوقف ينظم جوقة اللطامه
وبعاشر امحرم يشيل القامه
لو طبّر .. يتذكر
صرخة حيدر ابموكب مشق عد خيمة الحره
وفكرتنه .. ابطبرتنه
انكرر موقف أصحابه ودمانه اتجدد الذكره
والطّبر يا الله ... يارب تحشرني اوياه
___________
صح آنا ماضحيت إله ابفيض ادماي
بس آنا بعدي بنصرتك يامولاي
المشايه سيفي ورمحي ودمعة عيناي
ودرع الحماية منبرك صوت ابجاي
أنصارك .. زوارك
كل خطوة جدم محسوبه طعنه ابخاصرة خصمك
مشاية .. بالراية
و سبعينك ملايين أصبحت والكل قصد يمك
كل مشّاي ابمسراه .. يارب تحشرني اوياه