ياشايل نعش الوالي - مكتوبة

قصیدة : يا شايل نعش الوالي - ريَّض مشيتك
الشاعر : الاديب جابر الكاظمي

الرادود : الحاج ملا باسم الكربلائی

يا شايل نعش الوالي - ريَّض مشيتك
تانيني وارحم حالي - وآنه ارتجيتك أرد اودعه - من تشيعه
ريَّض مشيتك
*****
صحت والهم تبلاّني - ويلوج المدمع ابعيني
ايهداك اللَه يهالشايل - نعش والينه تانيني
أريد اتريَّض الممشه - تراني الهضم عاميني
واهيَّس نشفت ادمومي - ولاگطره ابشراييني
لَوَين بهالنعش گاصد - أريدك تسمع اونيني
أسوم اعليك أبو الزهره - أودع الوالي خلّيني
آنه الحره المظلومه - هاي آنه زينب
لمن ينحب لتلومه - گلبي التعذَّب
لا تفجعه - من تشيعه
ريَّض مشيتك

*****
يشيّال النعش ريتك - تهوَّن خطوة المسره
يريتك ترحم ابحالي - أودَّع والد العتره
گبل ماتوصل اللَّحده - تخطّه وبيدك تحفره
وگبل ماتنظر اعيوني - ابويه اموسَّد ابگبره
أريد اليوم اودعنَّه - وأشمَّه ابموضع الطبره
وأغسَّل شيبته ابدمعي - وحنيني ولهفة الحسره
وآنه ابحسراتي وهمي - ظليت أكابر
راح الوالي من يمي - بيمن أصابر
واشيرجعه - من تشيعه
ريَّض مشيتك

*****
گبل لا توصل لگبره - وتنزلَّ نعشه ياريتك
اشكثر يمشيَّع الولي - تمنّيت وترجّيتك
اويه أبو الحمله اريد احچي - وأگلّه اتغيب مدريتك
عگب عينك يضي البيت - مظلم يا علي بيتك
يريت الموت ياخذني - وتعيش انته تمنّيتك
مثل دم طبرتك دمعي - ويصب وابدمعي واسيتك
أتمنّه اتعيش بدالي - وميته عساني
يالما تبعد عن بالي - فگدك ولاني
ابعيني دمعه - من تشيعه
ريَّض مشيتك

*****
اشكثر اتحمَّل وأصبر - وأكابر عالحزن والهم
أطش هموم حسباتي - بعد لحظه ترد تلتم
گبل وجه الولي ياريت - وجهي ينخضب بالدم
ولاهذا النعش ألگاه - محمول اعله چف الغم
أدوَّر بلسم لجرحي - شفت بس الدمع بلسم
گلت يتشافه بدموعي - الجرح لكن أكثر اتألَّم
أقسم واحلف بالطبره - أتمنَّه موتي
ناديت ابصوت العبره - مايخفه صوتي
هاك اسمعه - من تشيعه
ريَّض مشيتك

*****
ألوذ ابكاسر الويلاه - وأطوف ابموجة المدمع
وأشيَّع هالنعش ويّاك - عسه نعشي الذي أتشيَّع
يريت الموت أخذ روحي - وأنام ابخطة المضجع
ولا أحضر لعد مدفن - أبويه الفارس الأنزع
الدهر من زعري يتَّمني - بعد من عنده شتوقَّع
المصايب تمرح ابچبدي - وتنفطَّر چبدي واتصدَّع
راح الوالي ومن بعد - ادموعي جراهن
واشموع الدنيه ابفگده - كلهن طفاهن
شمعة شمعة - من تشيعه
ريَّض مشيتك

*****
أبويه الما يبارجني - جبل چنت احتمي ابسدَّه
وإذا غابت شمس دنياي - اروح الگه الشمس عنده
عساها بالرمد عيني - وتظل طول العمر رمده
ولاشوف الگبر محفور - وأبوي اموسَّد ابلحده
وعساها انسدَّت بوجهي - نوافذ عمري من بعده
ولايمسي أبو الايتام - نايم بالگبر وحده
من بعد الوالد يكثر - نوحي وعويلي
ماشايل جثه حيدر - شايل دليلي
لاتصدعه - من تشيعه
ريَّض مشيتك