يالغايب وعدك ننتظره - مكتوبة

الشاعر : الأديب الحاج جابر الكاظمي

يالغايب وعدك ننتظره كلبك يايوم يطك صبره
واعيونك تنظر دنيانه جور وباطل ضيم وحسره
******
يابن الحسن طال الوعد وامن الصبر ملينه
وابجاهك الواحد احد يالمهدي تنهض لينه
ماأظن يحصيه العدد سيدي الجروح البينه
يالغايب وماظل بعد غيرك ايحن اعلينه
بتّارك يايوم اتجرده والباطل مناصله اتحصده
يالموعود انهض مولانه يمته اليل يطر ابفجره
كلبك يايوم يطك صبره
******
متحيره ابجفي القلم كثره العتب يالمهدي
من ياكتر عن ياألم لو ردت احجي وابدي
جم مره دين الله انلثم جم كلب جرحه اليدي
بجفك متى يرف العلم وضعن الفرج بي تحدي
دينيتنه الجور اغطيهه جا يمته ابعدلك تمليه
والدين اتشيد بنيانه يالتنظر حالتنه الخطره
كلبك يايوم يطك صبره
******
تدري يمن بيك الامل جدك رسول الرحمان
بعد عله فراش الاجل وانكلبت اهل العصيان
رجعت على عهد الجهل عقدة سقيفة بهتان
هو الوصي وليش انعزل من حكمه داحي البيبان
للامه الوالي ايعرفونه وحك حيدر ليش ايغصبونه
الكرار المعروف ابشانه وعُبّاد الاوثان اتنكره
كلبك يايوم يطك صبره
******
دار البتول الطاهره بضعة الهادي المختار
وهل الدار جانت عامره للبشر تزهي الانوار
واهل السقيفه الغادره يوم اللي هجمت عل الدار
ابعتبت الدار اموجره من اهل الحقد شبت نار
هالدار الهادي ايحيهه وجبرائيل الخادم بيه
هل ظلت وحشه وحزنانه متحيره ومظلومه الزهره
كلبك يايوم يطك صبره
******
يالمهدي ظن عندك خبر بالصاير يبن الاطياب
وياضلع يالمهدي انكسر ويادمع عل الخد سجاب
ريتك جنت يالمنتظر من دفعوا اعليه الباب
واعله امك اتصد بالنظر يالمهدي جا كلبك ذاب
خلف الباب امك من لاذت دفعوهه وابحشاهه انصابت
للمحن صدّت لهفانه لنّهه اموسده فوك الغبره
كلبك يايوم يطك صبره
******
حاضر لٍٍِون يابن الحسن بالطف جنت يم احسين
واتشاهد اشلون امتحن جدك ابين الصوبين
واعله النهر حامي الضعن لارايته ولا الجفين
وسهم المثلث بالطعن جبده وتكطع نصين
يالغايب والظهره اتعده واينازع بالحومه وحده
من طاح احسين ابميدانه خل اعداكم ريض صدره
كلبك يايوم يطك صبره
******

وعدك علينه غاب**وينك يغايب
وعدك علينه طال**وينك يغايب
ماعدنه مهجه وروح** نحمل مصايب
وينك يمن باحماك**عشنه وريبنه
وغيبتك يالمحجوب**وطالت علينه
واحنه ابهظم وابجور**وشي طاح بيدينه
ودنيانه محنه ونوح**ودمعه ونوايب