ليلة ميلادك (مكتوبة) - باسم الكربلائي
منذ ٧ سنوات٣٨٢مشاهده
قصيدة : ليلة ميلادك
الشاعر : ايهاب المالكي
الرادود : الحاج ملا بلاسم الكربلائی
المناسبة : ولادة الامام حسن المجتبى(ع)
15 رمضان 1438
ليلة ميلادك بيها انرسم
لوحة ايثار و عفة و قيم
يا بومحمد يا راعي الكرم
******
بالمهد من ضوا نورك
الشمس دنگ ضواها
يالحسن يا هو مثيلك
بالمهد و يقبله طه
انت يا آية إمامة
و حيدر بصوته تلاها
باسمك أجر من ينلفظ
يا سجدة و آيات الفرض
يا نسمة مرت عالأرض
و الخلود اشتم هواها
يا عشق المتوارث من هلي
يا عطر الجنة و ثمرة علي
قلب الزهراء المهموم ابتسم
يا بومحمد يا راعي الكرم
******
الجنة من قبل الولادة
بشوق مدت لك ايديها
و الأرض فرشت ثراها
تنتظر تنزل عليها
لكن انت واعدتها
تنظر الزهراء و تجيها
قالت لك المدة شكثر
قلت لها من يقضي العمر
قالت لك اي راح انتظر
و الدمع بان بحچيها
سواك الباري و قلبك سمح
من ترفع چفك تمطر صلح
غصن الزيتون بنهجك قسم
يا بومحمد يا راعي الكرم
******
هنأ جبريل بقدومك
نبرة الفرحة بكلامه
سيدي و الكون كله
بنظرة عيونه ابتسامة
كل ملائكة الله صاحت
الحمدلله عالسلامة
يالضيك يعشقه الرمش
مولود من نور العرش
مكتوب عاللوح بنقش
تشفع بيوم القيامة
خطوات اجدامك تحيي الثرى
يا ذخر المؤمن للآخرة
يوم الما ينفع بيه الندم
يا بومحمد يا راعي الكرم
******
اسمك يظل ببريقه
شما عتق عمر الزمن
كل حرف من عنده غيرة
حاشى ما خيب لي ظن
علي تثلج صدره كنية
لو سمع يا بوالحسن
يالاسمك احلى من الوصف
رمضان و بليلة نصف
انطي حياتي لكل حرف
لو طلبوا لاسمك ثمن
اسمك بالروح و قلب انكتب
بماي عيوني مو ماي الذهب
يالبحروفك يحتار القلم
يا بومحمد يا راعي الكرم
******
بشخصك التاريخ قصر
ما حظى بالمنصفين
سيد و تاريخك انضم
من رواة المشركين
بالاضافة لهذا كله
احنه هم مقصرين
ينراد ثورة معرفة
و الغبن دورك نكشفه
تعلا الاصوات المنصفة
و ينرفع ظلم السنين
واجب عاليمشي بنهج الإبا
يقرا عن تضحية المجتبى
ياخذ بيده افكاره من الظلم
يا بومحمد يا راعي الكرم
******
أيقنت ما ألقى واحد
مثل حنيتك لضيفك
اليجي بالرؤية شخصك
و اليمر بعينه طيفك
لو صحى من نومه يلقى
يم جفن عينه مضيفك
محسود خطارك على
انت الچنت تستقبله
محلاها لو قتله هلا
تقسم وياه من رغيفك
حقه يتباهى بطول الزمن
من يفتخر خطار الحسن
زادك كرامة و نخوة و شيم
يا بومحمد يا راعي الكرم
******
الخوف ما مر بيك يدري
ما له بقلبك مكان
بالحرب حتى التضربه
بسيفك يحس بأمان
سيدي آخذ لك تحية
لصولتك بالنهروان
ضربة يمينك موجرة
يبن المقاتل حيدرة
والنعم يا قسورة
بالشدد زودك يبان
سيفك منطيك حچاية و وعد
ما يهتز مهما كان العدد
سيف اعداءك من زوده انثلم
يا بومحمد يا راعي الكرم
التعلیقات