لا تتأخر عليه (مكتوبة) - باسم الكربلائي

قصيدة : لاتتأخر عليه
للشاعر : علي السقاي

الرادود : الحاج ملا بلاسم الكربلائی
المناسبة : شهادة أمير المؤمنين ع
العاشور البصرة ليلة 20 رمضان 1438

يِعود الله ليالينه إذا باچر تِلاگينه
الوعد يوم المنيّه لَتِتأخّر عليّه
******
 بالسلام اِعليك أبدي
اْو رحمة الله ياعلي
اِشتاگِتك فاطمه اْو تِسأل
إنته مو مشتاگ اِلي؟
ماأعاتِب وَادري إنته
اِبجرح راسك مِبتِلي
لچن كافي الفرگه طالت
لا تِگلّي اِتحَمِّلي
يوم لو تتأخّر اَكثر
أَطلُب الرب العلي
آنه ارد للدنيا لجلك
علي ياجَنّة هَلي
صعُب شوگي وَلا اْتحمّل
كسُر ضلعي عَلَيّ أسهل
واذا مِشتاگ اِليّه
لَتِتأخّر عليّه
******
أنا المُضطره ابمُصابك
وَاندعي اِبأمّن يُجيب
جرحك اشلونه يحيدر
گِلّي واشگال الطبيب
بين نارين اجعلتني
اْو مَدري بالأكثر لهيب
هم اريدك لَيّه ترجع
هم اريدنّك تطيب
عندي حَلْ وَادري يعجبك
يالصرت عگبي غريب
ابشوفة الأحباب يشفه
اْو يلتِئِم جرح الحبيب
فقط بَسمه مِن الزهره
اْو بعد ماكو أثَر طبره
دواك اَصبح بديّه
لَتِتأخّر عليّه
******
عفتك اْو لا شَعره بيضه
اِفراگي شنهو اِمسَوّي بيك
إرجع اْو يرجَع شبابك
وِانفُض اهمومك بِديك
مثِل ضلعي الطبره تِشفه
اْو بالدَليل آنه أجيك
خدّي ذاكه الچنت اَسِترَه
بعد ماسِترَه عليك
ابعين وحده چنت اَشوفك
من أصد بعيوني ليك
باچر اِبثنتين اَشوفك
خَل تِگُر مِن ألتِگيك
أتانيها مِن الفرگه
تِجي اللّحظه اليِصِح مَلگه
اْو علي اْو فاطم سويّه
لَتِتأخّر عليّه
******
أَمِس ماتدري اِشوَضِعنه
وانته ساجد للجليل
مو علىٰ بَعضه مُحمّد
والسمه اِصياح اْو عَويل
اِنهدمت اركان الهدايه
ابحين ناده جبرَئيل
الينظُر الهادي يِظنّه
هُوّه مو إنته القتيل
اْو ألله لَيراويك حالي
مِن شفِت دمّك يِسيل
لا أموتن موت ثاني
اِدخيل ياحامي الدِخيل
وَانا لو ما إلي خاطِر
نَبيّـك لا يِظَل حاير
يِگلّك رحمه بيّه
لَتِتأخّر عليّه
******
آنه أَسأل وانته إِسأل
نِحچي وِانرِد الجواب
حسن واحسين اِشخَبرهُم
عگبي بِسنين الغياب
اِنچان تِسألني اعله مِحسن
كُبَر مِحسن صار شاب
اِيگلّي ياريت المُرادي
ابسيفي راويته العذاب
اِسمَعته يدعي ياإلاهي
لو دُعائي مُستجاب
إلعَن اللي طُبَر حيدر
والدِفَع عالزهره باب
يَبوالـمِحسِن ترا اوليدك
مِن العَصره واهو ايريدك
حِچه ابدمعه جريّه
لَتِتأخّر عليّه
******
گبُل مَتوَدِّع بنينك
مِنهُم اُطلُب يالأمير
ينصرون احسين بالطف
يوم مايلگه نصير
ذوله مَن چَنهم كواكب
أربع اقمار اْو تِنير
ياعلي صح اختيارك
أُمهُم اِبلايه نَظير
بُقه آخر طلب عندي
إخِذ چف ذاكه الچِببر
ابچفّه خل چف العقيله
اْو كافل اِلزينب يصير
أَنا اِلزينب رِدِت كافِل
اْو يلوگ اِلها أبو فاضِل
اْو عگُب هاي الوصيّه
لَتِتأخّر عليّه
******
ابرَجعتك يبدأ شَمِلنه
يلتَمْ اْو هذا وعد
باچر انته الحسن تالي
اِيجينه لو چبده اِنمُرد
نجتمع بيت الرساله
أربعه اْو ناقص عدد
اِنروح يم احسين كلنا
ابكربلا انشوفه انفُرَد
دامي والشمر اِعتناله
اْو عالصدُر ثنّه اْو گِعَد
وَاغمُض اعيوني وَالاگي
الراس مو يم الجَسَد
الشمِر يضحك عگُب ذَبحه
اِبوجه زينب يِهِز رُمحه
اْو تناديك السِبيّه
لَتِتأخّر عليّه