ناح الحمام (مكتوبة) - باسم الكربلائي

قصيدة : ناح الحمام لشباب الأيمة
الشاعر : ميرزا عادل اشكناني

الرادود : الحاج ملا باسم الكربلائي
المناسبة : شهادة الامام الجواد _ بغداد

طور : اكتب_عذابي
ليلة ٢٧ ذي القعده ١٤٣٨ جامع علي باشا

ناح اِلحمام اِلشباب الأَيِمَّه
ناشِر جَنَاحه اوْ يحُوم اِعْله جسمه
نسمع هديله دمعه يسيله
******
للجواد اِشچم جَنَاح اللي تكسّر
چم حَمَامه ابْحِزن دمْعَتها اِتحدّر
او حين شافت عالسَّطِح خدّه تعفّر
گامت اِتظلّل عليْه او فوگه تِفْتَر
إبن الرّضا عالسَّطِح شفته من مات
رفت على راسه سَبْعَة حَمَامات
او كلمن يجيله دمعه يسيله
******
من أرض مكّه ابْجَناح اليستعر نار
شاهَدِت أوّل حَمامه گِصْدَت اِلدّار
إِلْحمامه الچانت اِوْيه الهادي بالغار
للجواد اِتْعنَّت او مدمعها مدرار
عُمْر اِلحمامه مِن اِلهجره يِمْتَد
تبدي ابمحمَّد و تِنْهِي ابمحمَّد
ابساعة رحيله دمعه يسيله
******
و الحَمامه الثانيه اِتعنّت حزينه
گصْدَت اِلدار الجواد اِمْن المدينه
جابت اوياها دمِع بضعة نبينه
او مرِّت اِبْگبْر الحسَن جابت ونينه
منّ المدينه حَمَام اِلّلي گاصِد
جايب أمانه مِنَ اَرْبَع مراقِد
يسعر دِليله دمعه يسيله
******
و تالي بِدْمُوع الأرامِل و اليتامه
وصْلَت اِمْن أرضِ النّجف ثالِث حَمامه
للجواد اتخاطبه اِبحسره او ندامه
اتْگِلّه جَدّك علي يبعثلك سَلامه
بعدَك شباب او تجيك المنيَّه
عُمْرك يذكرني عُمْر الزچيّه
ابونّه ثجيله دمعه يسيله
******
وحين طاح اعله السَّطح وايدير بالعين
گصْدته رابع حمامه ابساعة البين
إجت تنزف بالدّمه من الجَناحين
هيّه هاي اِلچانت اترفرف عله احسين
من كربله هالحَمام اِبْمناحه
سافر عگب ما تخضَّب جناحه
بالدَّم مسيله او دمعه يسيله
******
و الحمَامة الخامسه ابهاي الرزيَّه
هيّه أوْله بالحزِن من اِلبَقيَّه
هذا يومك يا حَمَام الكاظميَّه
باِلشمس إبن الرَّضا طايح رميَّه
واجب تجي يمّه و ابهمَّه تحضر
و اتوَاسي بالدمعه موسى اِبْنَ جعفر
موسى إِلنَزِيله دمعه يسيله
******
او رغم ما عنها الدرُب طال او تِبَعَّد
إجت مِنْ يَمْ گبْر أبُوه اِليوم تشهد
إِلْحمامه السادسه مَوْطنها مشهد
من أبو امحمَّد إجت تحضر مُحمَّد
شفنه الحَمامه تعنَّت كئيبه
جابت رسالة حبيب اِلحبيبه
أرسَل عوِيله دمعه يسيله
******
و الحمامه اِلْوصْلَتِ ابآخر المأساة
تختلف رحلتها عن كلِّ اِلحَمامات
من گبُر زينب إجت تطوي المسافات
امن الغريبه للغريب اِتجيب دمعات
اِتْگلّه يعمّه صُبَح حالي حالك
بالغربه محّد إجالي او إجالك
جفْن العقيله دمعه يسيله