وين الأحباب (مكتوبة) - باسم الكربلائي

قصيدة : أسألك ياقلبي وين الأحباب
الشاعر : سيد عبدالخالق المحنة

الرادود : الحاج ملا باسم الكربلائي
المناسبة : شهادة الامام الجواد _ بغداد

طور : أريدك_تجيني اجيتك_أخدمك
ليلة ٢٩ ذي القعده ١٤٣٨ العتبة الكاظمية

اسألك يقلبي وين الاحباب
بعدهم اصارع چف الغياب
عمري بالهم يبتدي
صعبه غيبة والدي , وين الاحباب
******
غياب الأب صعب والفاقد يعرفه
مثل بيت الچبير وينهدم سقفه
أبويه الماي والحماي والعفة
أحس ربي يحبني من أحب چفه
يَ درعي يَ سيفي المايكسروه
أبويه حبيبي المايغيروه
هو ذخري ومسندي
صعبة غيبة والدي , وين الاحباب
******
انا الهادي وسموم النايبة بدمي
ثمان سنين عمري وانذبح حلمي
شفت نعش الأبو ينشال من يمي
أحاول أمشي بس مايرتفع جِدمي
دمعتي يتيمة وآنا محروم
عزيزي أشوفه قبالي مسموم
يادهر لا تعتدي
صعبه غيبة والدي , وين الاحباب
******
أبويه سنين يحملني على ظهره
وأنا مره حملته لكن لقبره
اذا حِمْلَه على متوني بكثر عمره
أبد ماجازي من ذاك البحر قطره
أعاين واعاتب وجه التراب
أشوفه يوّرد من يضم شاب
ياجراحاتي اشهدي
صعبه غيبة والدي , وين الاحباب
******
حياتي بلا أبو ياناس ما تِحلى
چنت أتمنى أتعب وأنكسر لاجله
شكثر نمت على ايده وهوّه يتسلى
وانا نوّمته مره بس على القبلة
نظرني ونظرته نظرة وداع
كأني بسفينه وطاح الشراع
والبحر قيّد يَدِي
صعبه غيبة والدي , وين الاحباب
******
بنى لي دار حتى أستقر بيها
وانا ابني له قبر يا وسفه تاليها
يلبسني وثيابْ الحلوه يشريها
وانا اشري له چفن وهدومه أنطيها
شسوي وأجازي تعبك شلون
يغالي رخيصه حتى العيون
يا ليالي عاودي
صعبه غيبة والدي , وين الاحباب
******
يشايل نعش أبويه تمهل شويه
أريد أسمع شقال اليوم ناعِيّه
يَ جرح الما يألم غير راعيّه
شموعه الخمسة والعشرين مطفيه
طفوها شموعه أهلِ الأحقاد
عليمن قلعتوا باب المراد
يادموعي اتْسَيّدِي
صعبه غيبة والدي , وين الاحباب
******
ذهب كرسي الحكم والناس مفتونه
نعم ينسون ربهم من يشوفونه
يظن المعتصم أيامه مأمونه
لَوَنْها تدوم چا دامت لهارونه
تمزق جبدته فاطمة اليوم
محمد ينادي آه يَ مسموم
يا إلهي وسيدي
صعبه غيبة والدي , وين الاحباب
******
بني العباس لازم تسمع أخباره
عَدِل هذا الجواد وذولا أنصاره
ملايين الإجت وتطالب بثاره
تدوس المعتصم أقدام زواره
موالي يَ شيعي ساعِتَك هاي
أريدك تشيع والدي وياي
موعدك وَيْ موعدي
صعبه غيبة والدي , وين الاحباب