غمضي عينج
قصيدة : غمضي عينج
الشاعر : عبد الخالق المحنه
الرادود : الملا محمد ابو جباره
المكان : حسينية داوود العاشور -البصرة
غمضي عينج - واستراحي من القهر - غمضي عينج
غمضي عينج - يجري بعيونج نهر - غمضي عينج
يالغريبة اعتابج مايضمه ترابج
******
ودعي حزنج وارحلي
باقي ينتظرج علي
روحي واشكيله اللألم يالحبيبه
سلمي وجفوفج حمر
من اثر حبل اليسر
من بعد راعي العلم جم مصيبه
روحي برماد الخيم
خلي دمعج يجري دم
وصورة مثلث سهم يالغريبه
واستراحي - انسي ايام الحزن - واستراحي
واستراحي - وانسي آلام المتن - واستراحي
روحي وادري امصابج
مايضمه ترابج
******
ظلت ابعينج صور
جثة مسلوبه او نحر
صورة زنود وكمر عالوطيه
اغفي يا ام الخدر
وانسي نظرات الشمر
لقبج طول السفر يالسبيه
خلصن اسنين المحن
والقبر آخر وطن
قلبج سنين انتظر هالمنيه
ياحسافة - قبرج ابغربه انحفر - ياحسافه
ياحسافة - خلي يرتاح الدهر - يا حسافه
يبقة دمع غيابج مايضمه ترابج
******
حارت الجن وانس
ياقبر يخفي الشمس
صبرج يضمه اللحد ياعجيبه
روحي يالكلج عتب
واخذي وياج التعب
حزنج يشيب الورد يالعقيله
ليلة الطف بألف
عجبة دمعج مايجف
يجري بعيون المحب ظل مسيله
ها يزينب - كافي كلبج يرجي - هايزينب
ها يزينب - يا خو لدفنج يجي - ها يزينب
يالحسبتي حسابج مايضمه ترابج
******
واليموت بغربته
والله وحشه اجنازته
يكسر الخاطر يظل والله حيره
وانتي من يحضر الج
يا وسف خلصوا هلج
لا اخوتج لا اهل لا عشيره
والنعش من يحمله
وانتي اخوج بكربله
لا خبر منهم وصل يالأسيره
يالأسيره - روحي بمه وعاتبي - يالأسيره
يالأسيره - ميته من يوم السبي – يالأسيره
يبقه نور حجابج مايضمه ترابج
******
باللحد نامي رغد
لا يسر لا هم بعد
هذا حسن الخاتمه يالصبرتي
موتي وانتي بدمعتج
خل يشوفون اخوتج
صيحي يمه فاطمه ماحضرتي
يمه واسياط الهظم منها توصل للعضم
انتي بت حامي الحمه وانضربتي
ها يكافل - خويه اول ما طحت - هايكافل
ها يكافل - وانه عالناكه ركبت - هايكافل
قلي سهم الصابج مايضمه ترابج
******
لفي روحج باللوه
والقمر يمه ضوه
وابجي يمه براحتج دمعه دمعه
صيحي سبع القنطرة
والشمر طكني تره
سب ابوي بغربتي من يمنعه
يمشي وياي بقصد
وانه كلبي يرتعد
صوته يمرد مهجتي من اسمعه
من شتمني - ازعلت خويه وصحت - من شتمني
من شتمني - باوعتلي وسامحت - من شتمني
قتلي شوق احبابج ما يضمه ترابج
التعلیقات