مابين الخيم (مكتوبة) - جليل الكربلائي
منذ ٧ سنوات٢٥٤مشاهده
قصيدة : ما بين الخيم...محبوب و حبيبه
للشاعر : السيد رضا البوشوكه
الرادود : الحاج ملا جلیل الکربلائي
******
ما بين الخيم...محبوب و حبيبه
و المدمع رسم...بت حيدر غريبه
باجر عقيلة حيدره...باجر أخوها اعله الثره
مذبوح حسين...مذبوح حسين
******
تعثر بالمشي زينب و حارت تخفي يا جمره...نوبه اتشم اخوها حسين و نوبه اتقبله بنحره
تقله يا ضوه اعيوني عليك بفاطمه الزهره...اشحال الاخت لو شافت اخوها ينسحق صدره
لو ثنه الشمر...و انت اعله الصعيده
و أصرخ بالخدر...لا تقطع وريده
باجر اختكم حايره...باجر اخوها اعله الثره
مذبوح حسين...مذبوح حسين
******
أريد أشتم عطر أمي يخويه اهواي مشتاقه...غربه و بالغرب تدري الأخو يا لوعة افراقه
امن أودعكم دريت حسين تظل نيراني حراقه...و باجر آه من باجر العدو ايصعدني عالناقه
أمي فاطمه...بالمصرع حزينه
و اتنوح السمه...حسين موذرينه
باجر خيمها اموجره...باجر اخوها اعله الثره
مذبوح حسين...مذبوح حسين
******
دارت صوب ابو فاضل زينب بالوجه حيره...تقله امن اسمع بطرواك قلت عباس أبو الغيره
يخويه اشلون تقبلها أخييتك تطلع ايسيره...يماشيها القطع راسك من ديره لعد ديره
يا راعي العلم...تسبيني الشماته
حسرات و ألم...ليلي اشلون أباته
باجر تحير امخدره...باجر اخوها اعله الثره
مذبوح حسين...مذبوح حسين
******
لتودعني يا عباس و خل يبقه العلم منشور...كل خوفي أشوف حسين يرجع لي بظهر مكسور
يصيح بصوت يا زينب كفيلج عالنهر منحور...و من بعدك عساكرها بالطف عالغريب اتدور
عالتل حايرة...و أنعاك ببواجي
ظنوة حيدرة...ايسلبوها التراجي
باجر تشاهد منحره...باجر اخوها اعله الثره
مذبوح حسين...مذبوح حسين
******
بين حسين و العباس زينب سالت الدمعه...أخته اتودع الخوان و صارت بينم شمعه
تبجي اشلون خويه حسين و باجر ينقطع صبعه...من الخيم حد التل كل خطوه ألف وقعه
جاوين الكفل...أصرخ بالمعاره
انهض بالعجل...قلبي تسري ناره
باجر هضيمه اميسره...باجر اخوها اعله الثره
مذبوح حسين...مذبوح حسين
******
باجر لا علي الأكبر يمي و لا يظل جسام...و حته الطفل ما يسلم تحز المنحر الظلام
باجر لا قمر هاشم يمي و حايرة بأيتام...يرد حسين و عبدالله اعله ايده و يصرخ بالآم
عبدالله انذبح...زينب يا غريبة
دلالي انجرح...من سهم المصيبة
باجر تشوف الطاهره...باجر اخوها اعله الثره
مذبوح حسين...مذبوح حسين
التعلیقات