لا يضل بالك عليه (مكتوبة) - عمار الكناني

 

 

لا يضل بالك عليه إدخيلك
ياحبيب اعيوني راح ادعيلك
خليني انام وروح يحسين
تتركني ما تتحمل العين
ياحبيب عيوني راح ادعيلك

غافلني لمن تبتعد
لتكلي وامشي السفرتك
ومن تمشي لا تندار ابد
وكول العليله عذرتك
غطيني بيدك لو نمت
بس شرط بِمصلّايتك
وسولفلي قصه اعله الهجر
واختمهه بويه إبقُبلتك

ولوشفت دمع الحزن يتجاره
يعني جاي احلم أضل محتاره
ماأمتلك بس هل جلمتين
تتركني ما تتحمل العين
ياحبيب عيوني راح ادعيلك

لوتدري بويه إشحضّرت
من الدعاء إبكل صُبح
دعواي يارب العُله
تحفظ ابوي إمن الذبح
سَهّل طريقه الكربله
ونزّله مايك من يشح
جنبه السهم يا خالقي
وتحفظه من سِن الرمح

اوكت الغروب الدعاء الثاني
تحفظ سكينه وجميع اخواني
أمّن يبويه إعله الدُعائين
تتركني ما تتحمل العين
ياحبيب عيوني راح ادعيلك

لا ينشغل بالك عَلَي
بجدامي كل الحيل احس
وبعلتي لتفكر بعد
زينه اصبحت مومثل امس
روح ويباريلك علي
من الضمه وحر الشمس
بس ضمني حيل اعله الصدر
وخليني احاجيك ابهمس

وينه صدرك أرد اشمه شويه
وخل اهيم ابعالم الحنيه
كبل الخناجر والسجاجين
تتركني ما تتحمل العين
ياحبيب عيوني راح ادعيلك

بذني سمعتك من كلت
ماتمشي للطف فاطمه
يالغالي ما زعلانه ابد
والموقفك متفهّمه
هوه آنه من دون اخوِتي
ودون البنات إمعلمه
بالدار اضل صبح ومسه
يحسيني لجلك خادمه

صعبه امشي إوياكم اعرف بيهه
والسياط اتريد إليلاويهه
راح اصبر وتالي الصبر وين
تتركني ما تتحمل العين
ياحبيب عيوني راح ادعيلك

إمحالل يبويه إعله الدمع
هذا التشوفه اعله الجفن
وباريتك الذمه ولو
من تمشي راح ابقه بسجن
راح افرش افراشي رمل
والرمله مو مثل الحضن
ودارك أودعه وآنه بي
واكتب علي دار الحزن

إوجَني ما أدري وأدكن بابي
منهو اصيح ؟ ويا هله ابغيابي
وإنوبه أصفن مثل ميتين
تتركني ما تتحمل العين
ياحبيب عيوني راح ادعيلك

منك أريد آخر طلب
ويحسين نفذ طلبتي
ودعني عند ام الكمر
وبجفهه تمسح دمعتي
وصيهه دوم إتمُر علي
ما بيه حيل الوحدتي
خافن اموت إمن القهر
ومحد يحس إبموتتي

كلهه لا تتعطلين اعليهه
إبحضنج إلربّه الكمر نوميهه
عينج عليهه يم البنين
تتركني ماتتحمل العين
ياحبيب عيوني راح ادعيلك

للشاعر علي الإبراهيمي