تحلم بطلع قمر سماي (مكتوبة) - عمار الكناني

 

 

تحلم بطلعة گمر سماي
وينتظر جية نهر ضماي
صار دخان الخيم هواي يا بو فاضل
...
اختنگت عيوني بدمعها ومطرت بخدي عتب
صارت دموعي رخيصه وجانت اغله من الذهب
آه يا جرح الشريعه عمر من عندي سلب
گمر چان يضوي ليلي بوكت ظهريه انهب

كلشي ليل بعيني بعده صار
بكربله ايدور ضوه النهار
جرحي عاش اودعت دواي
...
النهر بعدك جود يبچي ويمنتك تبچي علم
للدمع ماكو سوالف وتبچي برماد الخيم
چلمة العباس وينه نامت بضلعي سهم
والاخت لو راح اخوها اتعيش دنيه من الألم

يل چنت لم الخدر خَيال
يا امان بعازتك تعال
عمري ابيعه لو تگلي جاي
...
خيل وصياح وعجاج ونار وسياط وشتم
اركض واحچي اويه روحي انشالله هذا حلم
الحرم كلها تصيح زينب وسفه شافتنه الزلم
ودّي للعباس طارش خاف ماعنده علم

بحزني اعثر وعْله وجهي آْطيح
اوينه شيال العلم اصيح
تركض سياط الشمر وراي
...
حسين سورة فجر بالطف وانقرت بس بالعكس
الله لا ينطي الحوافر طاحت بصدره رفس
عالأرض قران عاري وغيّرت وجهه الشمس
وطاحت دموعي اعله نحره تگله إشرب بس همس

والأخوها مسلب اشتگول
والقميص بحافر الخيول
الدنيه خنگه وانذبح هواي
...
هاي آخر ليله يمكم الله ليجيب الصبح
والسبي بدربه سوالف اشد من حچي الذبح
للحبل چفي يتاني وراسك ايتاني رمح
من گبل شوفة شمرهم ردت موتي وما يصح

راسك ايصلي عله القناة
والجسد تسبيحة الفرات
لو عطش انته التشربه ماي
...
ماتت حچاية رجعتك وانتهه كل الكلام
في امان الله يخويه رايحه وجدامي شام
هناك ما راح الگه خيمه وبالخرابه راح انام
تروح من ايدي رقيه وتنطفي شمعه بظلام

راح اعيش بدنية الضياع
يا بعد عمري الى الوداع
راح اعوفك وارحل لسباي
...

للشاعر كرار حسين الكربلائي