اكتب بالدموع
منذ 8 سنوات
٦٧٧
قصيدة : اكتب بالدموع
للشاعر : عمار هليل الواسطي
الرادود : الحاج ملا باسم الکربلائی
طور : مارايدة_الماي
ليلة ٢ جمادى الثاني ١٤٣٩هـ _ بغداد
أَكـتِــبْ بالدمــوع ويّاك العهد
واتصيح الجروح يالمهدي مدد
*****
يالغايبْ اسنين وآنه بهالـوَضعْ
مِن وَحْشَة الليل أضْويلك شمعْ
ما ظلّت اشموع طفّاها الدمعْ
صابر والاحزان للمُهجه طَبعْ
خايفْ يمولاي ما شوفك بعد
واتصيح الجروح يالمهدي مدد
*****
گلبك يغايب يحمِل چَم جرح
يَمفارگ أحباب بالسَم والذَبِح
دمْ دمعك اشلون عالخد ينسفح
عذّبـنـي هالليل يا شَمس الصُبح
حزن المُعانـــات بالروح إنولد
وتصيح الجروح يالمهدي مدد
*****
حاضِر بالگلوب غايبْ عالنظر
يمـته يَمحبوب يسعفني القدر
وأسمع بالاخبار المهدي ظهر
صَدّگني مليت مـن دهرِ القهر
يا نار الفراگ مِن كل نار أشدْ
و تصيح الجروح يالمهدي مدد
*****
كل لحظةْ إغياب مَحسوبه سَنَه
وإتخيّل اشلون أنـتـظــرك أنه
ما غَيرْ الهموم بيّه ساكِنه
كل جرح بجفاك گلبي مَوطنه
طال البُعد طال يمته اتخلّي حَدْ
واتصيـح الجروح يالمهدي مدد
*****
بهاي الليالي حاضِر سَيدي
مجلس عزانه باسمك يبتدي
كل دمعه كل آه لجلك تنهدي
إگلوب المُعزّين كلها تفتدي
تفديك الأرواح بالعِدّه وعَددْ
واتصيح الجروح يالمهدي مدد
*****
يا أغلى عدي من شَمّ الهَوه
مُوتي وحياتي بغيابك سوه
تظهر بيا يوم ويرفْ اللـوه
يا مَن ظُهورك لجروحي دوه
ما كافي ترحال هسّه بيا بَلَدْ ؟
واتصيح الجروح يالمهدي مدد
*****
يا بَهجة الروح أقسِملك قَسَم
كل هاي الأنصـار تـكـتـبـلك نعم
تدعي اللّه ويّاك تـتْـثـَبـّتْ قَدَم
يا صاحب الثار يا راعي الشيَم
يعجّل ظورك والباري شَهَد
واتصيح الجروح يالمهدي مدد
