يا حور (مكتوبة) - باسم الكربلائي

القصيدة : يا حور

الشاعر : الميرزا عادل أشكناني

 الرادود : الحاج ملا باسم الكربلائي

المناسبة : ميلاد الامام الحسن (ع) 

١٤ رمضان ١٤٣٩ هــ حسينية المرحوم داوود العاشور _ البصرة

 

يا حُور    بخرُوا الحسَن عنِّ الحسَد

يا حُور   ويْ فاطمه هِزَّوا المَهَد

يا حُور    للزهره هذا أوَّل ولَد

******

يا حُور خل امِّ الحسن هالليله تتهنَّه

نِثْرَوْا اِمْلَبَّس عالأرض من لؤلؤ الجنَّه

ما چنَّه من صِنْف البَشَر لا والله ماچنَّه

كل الجمال اليُوسفي يطلَع جزُء مِنّه

شوفوه   ما مثله مخلوق انِخِلقْ

شوفوه   و اتْعَـوِذوا اِبربِّ الفَلقْ

شوفوه   مثل الحسَن ما صار أبد

******

يا حُور مِدُّوا السُفْره بِسْم المُجتبه او آله

اْو خلَّو مُضيفه عامِـر اِبْگَهْـوِته و اِدْلاله

اِسماطين دجله و الفرات الباري سوَّاله

محروم كلمن ما إجه الليله اْو تعنَّاله

خسران   الْما حِضَر حفْل المُجتبه

خسران   الما فِرَح ويْ أهل العَبَه

خسران   للحسَن كلمن ما گِصَدْ

******

هالليله بسْم المُجتبه الأصوات تتعَلَّه

امْن البصره رايد للمدينه الصرخه توصَلَّه

والرايد أقراله شعِر و أبيات عن فضله

خلَّه يأشِّر بيده و ايگِلِّي : أعِـد مُلَّا

ممنون   للصُبح هالليله الحفِل

ممنون   خادم أصير اْو أمتثِل

ممنون   ويَّاكم آنه اعْله العهَد

******

أكبر جريمه انقارِن المُجتبه ويْ حاتِم

اْو حاتِم فتات الخُبزه من سُفرة بني هاشِم

هذا الذي جبريل چان ابمنزله خادِم

إِبْنُ عَـلِيِّ المُرتضى لا تْقيسه بالوادِم

ميْصير   اتقيس الحسَن ويَّه البَشَر

ميْصير    اتخلّي الفَحَم يمِّ الدُرَرَ

ميْصير    بالمُجتبه اِتقارِن أحَد !

******

الفردوس متزَيْنه غِدَت بالسُنْدِس الأخضَر

و السِّمَه السبَّعه اتبخِّرَت بالعُود و العنبَرْ

جبريل نازل و البشاره للنّبي اْو حيدَرْ

هالأمر من ربِّ السِّمه سَمُّو الوَلد شُبَّرْ

مبروك   يا با الحسن صَار الحسَن

مبروك  ما مثله واحد بالزَّمَن

مبروك   هالشِبِل من ذاك الأسد

******

من خير أبو اِمحمَّد نظل ناخذ ولا نقنَع

خل نعكِس الأدوار حتَّه الأجر يِتوزَّع

إنتو الرّواديد اْو أنا الجمهور و أرْد أسمع

صرختكم الّلي للحَسَن من الگلب تِطلع :

ماريد   كلِ ساعه أحشِّمكم أظَل

ماريد   وحدي أعيد المُستَهل

ماريد   واحد يظل ساكِت بعَد