القصيدة : آخر فرض يم الخيم

الشاعر : سيد عبدالخالق المحنة

الرادود : الحاج ملا باسم الكربلائي

المناسبة : شهادة سبع الدجيل

بداية المستهل : قميصك_المنشور

ليلة ٢٨ جمادى٢ | ١٤٣٩ العتبة العباسية

آخر فرض يم الخيم صلاتي

طف كربله يعلن خبر وفاتي

عالمشرعة والله ردت مماتي

*****

تعرفني كل الطايفه

سبع الدجيل أتلقب

عمري مآتم للحزن

و ابجي اعله عمتي زينب

و اتصور آنه بكربله

ضامي و دليلي يلهب

من أغرف الماي العذب

مثل القمر ما أشرب

و اللي عطش ماي العذب يريده

بس القمر عافه لجل عضيده

ناده فلا أشرب قبل اغاتي

عالمشرعة والله ردت مماتي

*****

من زغري احلم بالنهر

و المشرعة و الكافل

و ارسم صور عن كربله

صورة قتيل و قاتل

و اتنومس براعي العلم

و أتنخه يا بو فاضل

لزيارته اقصد مشي

عمي القمر يستاهل

يم النهر اكتب اله قصيده

لجل الشرف عمي دفع وريده

هذا الأمر بي خلصت حياتي

عالمشرعة والله ردت مماتي

*****

بعيوني جم صورة طفل

شارد و زينب كهفه

و بقلبي جم خيمه اسعرت

نار بدمع ما تطفه

زينب لبو فاضل تصد

بس ما يجيها بجفه

حبل السبي ياكل لحم

من الجفوف الترفه

مره قلت سوط الشمر نسيته

و اعله المتن حافر نهر لقيته

ظهري انحنه و اتوكئ بعصاتي

عالمشرعة والله ردت مماتي

*****

أُوصل التل الزينبي

ما اقدر اوقف عالتل

اتصور الصاحت يَخَيْ

ميت عدل جيت أسأل

يبن امي لو باقي نفس

بس بلغ اللي تكفل

قله العزيزه ميسره

يمها الشمر يتمرجل

من قررت ترجع بلا وليها

اتمنى لو ذاك الوكت اجيها

وكت الزعل مثل القمر صفاتي

عالمشرعة والله ردت مماتي

*****

يا ما غدر بينه الدهر

و الدنيه يا ما دارت

ما عدنه حرمه تنسبي

بس وي زينب صارت

سبعين ألف بايع بخت

كلها اعله زينب غارت

ما حارت بسوط السبي

بس بسترها احتارت

يا حسرتي زينب بقت وحيده

يمها الشمر و المشرعه بعيده

يبست من تره من العتب لهاتي

عالمشرعة والله ردت مماتي

*****

طاري السبي لمن يمر

عاصف يطشر صبري

و اتمنى يجويني الضمه

سيف الشمر حز نحري

و اتوزعت فوق الثره

داست الخيل بصدري

اهون و لا زينب توّن

و تنادي وصلوا خدري

اسمع طفل ينده يعم وِلُوني

وين المفر يا با الفضل اجوني

ضامي انه و يجري عذب فراتي

عالمشرعة والله ردت مماتي

*****

عمري انتهى بين الخيم

و المشرعه مشوراه

و اتمنه لو عندي صحن

يم القمر ومناره

آني ضوه بصحرة بلد

و اتسمه راعي الشاره

مشهوده لي چاره انه

للما إله كل چاره

كلمن وصل بابي اخذ مراده

و لكل مرض بيتي صفه عياده

كم معجزه ذكروا إلي رواتي

عالمشرعة والله ردت مماتي

اتصل بنا

من نحن

الكل