يتمتنى يا ابويه من عفتنى (مكتوبة) - جليل الكربلائي

قصيدة : فكري إتحير...حالي إتغير

الشاعر : الأديب الحاج جابر الكاظمي

الرادود : الحاج ملا جلیل الکربلائي 

 

فكري إتحير...حالي إتغير
راحو و أخذوا روحي إوياهم...و إشلون أتحمل فرقاهم
******
آنا العليله فاطمه طفله و فجع قلبي البين...عافوني أهلي إبحيرتي و ما أدري مسراهم وين
هالدنيه فجعتني و صرت محتاره ما بين إثنين...ما بين جمرة علتي و ما بين دمعات العين
أجري المدمع...عقب الأهل...ما ظل أمل
قلبي إتصدع...عقب الأهل...ما ظل أمل
أنسه الدنيه و ما أنساهم...و إشلون أتحمل فرقاهم
******
طفله و عله إفراش المرض بين الغصص و الالام...و الدنيه بفراق الأهل صارت سراب و أوهام
و أنتظر يرجع والدي و الجيته أحسب أيام...كل ساعه أحسبها إبشهر و إعليه كل يوم إبعام
تسعر ناري...عقب الأهل...ما ظل أمل
مظلم داري...عقب الأهل...ما ظل أمل
أحسب أيامي الملقاهم...و إشلون أتحمل فرقاهم
******
موج المدامع بالجفن فاض و طفح مثل السيل...و الفرقه تحتاج الصبر و إمنين أجيب إلها الحيل
من المرض فرقة هلي إتحملت من عندها الويل...أقضي النهار إبحسرتي و بدمعتي أقضي الليل
حيلي إتهدم...عقب الأهل...ما ظل أمل
و جبدي إتألم...عقب الأهل...ما ظل أمل
جم دوب أتنطر و اتناهم...و إشلون أتحمل فرقاهم
******
إنشالت الروح إمن الجسد لمن ضعن أهلي شال...و هاي الديار الموحشه بعيوني صارت أطلال
و حسراتي و إهموم القلب ما جانت إتمر عالبال...من هالزمان إشحصلت غير الهضم و الأهوال
إفراق و حسره...عقب الأهل...ما ظل أمل
دمعه و جمره...عقب الأهل...ما ظل أمل
دلالي إيتابع مسراهم...و إشلون أتحمل فرقاهم
******
من وني صارت حالتي تشبه حمامات الدوح...ظليت أحن حن الإبل و إتعلمت فن النوح
و من عيني مفقود النظر و إبجسمي ما ظلت روح...و بجرح قلبي ما يحس غير الحزين المجروح
أنحب وحدي...عقب الأهل...ما ظل أمل
وشظل عندي...عقب الأهل...ما ظل أمل
ما تسوه الدنيه بلياهم...و إشلون أتحمل فرقاهم
******
حايرة و مدهوشة فكر من يوم راحوا لليوم...ظلت اعيوني امساهره و ما شافت اعيوني النوم
ما أقدر أتحمل صبر من عقب أبوية المظلوم...شينشف ادموع الجفن شيداوي قلبي المالوم
جرحي الينزف...عقب الأهل...ما ظل أمل
دمعي اليذرف...عقب الأهل...ما ظل أمل
لو أقدر جنت أتعناهم...و إشلون أتحمل فرقاهم
******
أتمنه يلفيني الأجل و لا أبقه أحمل لوعات...عقب الأهل لا عايشة و لا أنحسب بالأموات
و توديع و افراق و مرض و لوعه و مصاب و عبرات...هم هذا يتسمه عمر لو هذا نوح و آهات
رايح عمري...عقب الأهل...ما ظل أمل
نافذ صبري...عقب الأهل...ما ظل أمل
أهلي الراحوا وين ألقاهم...و إشلون أتحمل فرقاهم