دللول دللول (مكتوبة) - جليل الكربلائي

الشاعر : الأدیب ناظم الحاشی

 

دللول...دللول...نور العين يالغالي
دللول...دللول...مهدك ليش ظل خالي
******
كلما أمرن بالمهد و اشتم عطر لثيابك...يوليدي جنك بالمهد ما نمت حدر اترابك
جدام عيني بكل وكت كل يوم أشوف امصابك...يوليدي ما ظل كل صبر سلاني ذل اغيابك
دللول دللول...لا ما تروح من بالي
دللول دللول...مهدي ليش ظل خالي
******
يوليدي نبلة حرمله ما تنسي و أنساها...ما جنها يمه بمنحرك و بقلبي جن خلاها
و الأخذ روحك يالولد ماخذني كون اوياها...و لا أبقه وحدي و شمعتي ريح الحقد طفاها
دللول دللول...طيفك دوم يبرالي
دللول دللول...مهدي ليش ظل خالي
******
كلما تصد عيني الطفل ترجع عليَّ أحزاني...تاخذني روحي الكربله و تصفر جميع ألواني
من بعدك و تدري الوكت سل الشمع سلاني...ما بين دمعي و حسرتي و جمرة حزن خلاني
دللول دللول...مثلك نار دلالي
دللول دللول...مهدي ليش ظل خالي
******
راسك ييمه اعله الرمح لليوم أشوفه بعيني...كلما تكف عيني الدمع يرجع لي و تبّجيني
يوليدي ترحل من زغر و بغربتي اتخليني...مشتعلة و بنار الحزن يا يمه شيطفيني
دللول دللول...كل هالضيم يجرالي
دللول دللول...مهدي ليش ظل خالي
******
كلما أشمن ريحتك بالمهد تبجي اعيوني...و الروح تطلع و أنتهي بآخر نفس يلقوني
أمك و بيك اتيتمت و امعذبه يعرفوني...ما عشت من بعدك أبد يالما عشت من دوني
دللول دللول...بلجي اتعود يالوالي
دللول دللول...مهدي ليش ظل خالي
******
كلما أمرن بالمهد و اقماطك اتذكرته...و اشلون من بعد السهم عبدالله من قطّعته
لو عمية قبل الطف و لا مذبوح نحرك شفته...ودعتك و طبع الطفل ما يرضه لو ودعته
دللول دللول...ماتت بيك آمالي
دللول دللول...مهدي ليش ظل خالي