يازينب السبية
الشاعر : السيد رضا البوشوكه
يا زينب السبية...عندي إلج وصية
عينج على رقية...من تدخل الشام
******
لو شفتي نيران الخيم يا بت علي سرية...عوفي الخيم خل تحترق بس لحقي الرقية
لا تنسطر من العدو جن سطرة الزجية...طفلة و أعز من الهوه تسبيها آل أمية
تشقف تظل بيديها...سوط الذي يجيها
طفلة و عقب وليها...تسبيها ظلام...من تدخل الشام
******
يختي التراجي تنسلب طفلة و تظل وحيدة...كل خوفي يخبرها العدو حسين انقطع وريده
و يقلها عمج عالنهر ظل مرمي عالصعيدة...من طاح أبوج اعله الثره اتعذر يجيه عضيده
خل يخبر الحبيبه...عن جمرة المصيبه
لحقيها يالغريبة...لا تبقه بالآلآم...من تدخل الشام
******
يختي على ذاك الرمح راسي العده تشيله...و أنظر رقية امجتفه دمع الهضم تسيله
طفله و تلوذ امن العده حاميها يالعقيلة...الما عدها والي امحيره يا هو اللي تشتكيله
راسه انقطع أبوها...عدوانه سلبوها
يا وسفه ما رعوها...لاذت بالأيتام...من تدخل الشام
******
يختي و صعب درب السبي عينج عله السبايه...و أعظم مصيبة طلعتج لا خوه لا حمايه
مجتوفة بيديج الحبل و اعله الثره الضحايه...لا قمر عندج لا شمس لا سيف يختي و راية
لا والي لا قرابه...تاليها بالخرابة
و الطفلة عالترابه...يا زينب اتنام...من تدخل الشام
******
ليل الخرابة اشقد صعب خوف و رعب ظلامه...و انتي الأميرة امحيره من وحشة اليتامه
حزني رقية اعله الترب ليل الحزن تنامه...و بخدها من جف السطر يا بت علي علامه
و آنا بحلم أمرها...تخبرني بالسطرها
فجّر دمع نظرها...خيبة هالأحلام...من تدخل الشام
******
تقعد تنادي يا خلق قلبي ثقل مصابه...مرني بحلم سبط النبي و اتوسد الترابه
راسي يجيبونه بطشت و اتشاهد الخضابه...لكن على راسي الأجل يلفيها بالخرابة
لو ماتت اليتيمه...تبقه بغرب هضيمه
هالفاجعة عظيمة...تغدرها الأيام...من تدخل الشام
التعلیقات