شفته بحلم - جليل الكربلائي (مكتوبة) - جليل الكربلائي
منذ ٣ سنوات٣٤٢مشاهده
الشاعر : الميرزا عادل اشكناني
شفته بحلم ... يضوي خرابتنا نجم
شفته بحلم ... عاين عليَّ ويبتسم
شفته بحلم ... بس شفته راس بلا جسد
******
عمة يا زينب أبوية حسين شفته
بالحلم بس راس إجة إبحضني وشبگته
إبنظرتي الأولى يعمه ما عرفته
إهواية متغير عليَّ من نظرته
ذاك الوجه ... متخضب إبفيض الدمه
ذاك الوجه ... ذابت شفاهه من الظمه
ذاك الوجه ... موضع جبينه منهشم
******
شفته بحلم ... يضوي خرابتنا نجم
شفته بحلم ... عاين عليَّ ويبتسم
شفته بحلم ... بس شفته راس بلا جسد
******
راسه من شفته إفتحت بچفوفي عينه
إسألته وهوه رد عليَّ من وتينه
گتله راسك هذا بس الجسم وينه ؟
گلي جسمي بالسيوف إمگطعينه
عفت الجسم ... و امن النحر دمه يسح
عفت الجسم ... بألف وتسعمية جرح
عفت الجسم ... عالغبره مسلوب الهدم
******
شفته بحلم ... يضوي خرابتنا نجم
شفته بحلم ... عاين عليَّ ويبتسم
شفته بحلم ... بس شفته راس بلا جسد
******
شفته يا عمه لچن لمن إجاني
گام ينظرني وغده بهمس بذاني
گلي انا ادري مشتاگه لحناني
وهاي آخر ليلة دلالچ يعاني
بس هالمسه ... دلالچ يشوف التعب
بس هالمسه ... والملتقى بطشت الذهب
بس هالمسه ...وتاليها جرحچ يلتئم
******
شفته بحلم ... يضوي خرابتنا نجم
شفته بحلم ... عاين عليَّ ويبتسم
شفته بحلم ... بس شفته راس بلا جسد
******
انا من شفته نسى گلبي عتابه
گتله گرت عيني نت شفتك ييابه
يا هلا بخطاري إلطول غيابه
بجيتك يا بويه نورت الخرابة
وابجيته ... يجبر دليلي المنكسر
وابجيته ... راح انسى خدي المنسطر
وابجيته ... اترك عتابي والمهم شفته بحلم
******
شفته بحلم ... يضوي خرابتنا نجم
شفته بحلم ... عاين عليَّ ويبتسم
شفته بحلم ... بس شفته راس بلا جسد
التعلیقات