شفتك طحت (مكتوبة) - مرتضى حرب
منذ ٣ سنوات٦٥٠مشاهده
الشاعر : عبدالخالق المحنة
شفتك طحت، بس ماطحت، هذا الأمر مافاهمه
مدري السمه، فوگ الارض، مدري الأرض فوگ السمه
ياحسين.. ياحسين
******
حته وإن شفتك طحت
حقه النظر من ينخدع
چانت وگعتك للسمه
واگع نعم بس مرتفع
دمك وصل يم العرش
واعله الارض طاح الدمع
شفتك صبح فاگد صبح
محني لچن واگف رمح
يم النهر شفتك جرح
ينزف ضماير مو دمه
مدري الارض فوگ السمه
******
صاعد مثل دعوة نبي
نازل مثل سرعة وحي
يـ الستحيت من الهوى
من الهوى ضل مستحي
اسمك على ساق العرش
لا يعتگ ولا ينمحي
شفت ارتفاعك من طحت
شفتك تجي لمن رحت
شفتك قوي من اتعبت
شفتك بدايه وخاتمه
مدري الارض فوگ السمه
******
نايم على رموش الشمس
وانته البعازة خد نهر
مديت الك چفي ونحر
يم خنصرك من انبتر
ماعوضك ضي الشمس
وانته المضيعلك گمر
شفتك ملت بس ماملت
صوتك وصل لمن صحت
شفتك نهر واستغربت
واشفافك اينزفن ضمه
مدري الارض فوگ السمه
******
مابينك وبين الخيم
خطوة عطش بأخر نفس
كل دمعه من زينب كأن
فوگ الصدر حافر فرس
گلبك يحن من ينطعن
عودك يخضر لو يبس
لوما چنت خيمة وستر
مايرفس ابصدرك شمر
واضح مثل لون الخدر
والمايشوفك بي عمه
مدري الارض فوگ السمه
******
اعمى السهم من ينرمي
صدرك مضيف ويا هله
يالواهسك واهس بحر
كثر السفن مو مشكله
يالحسرتك گد العطش
والخنصر ابگد كربله
جرح العطش مابي نزف
جرح المشاعر مو ترف
يالكلشي عندك يختلف
غير انته ابن حامي الحمه
مدري الارض فوگ السمه
******
من داستك خـيل العده
ماميّز الرض والكسر
واتطشرت واتجمعت
ماادري نحرك ياكتر
صدرك اشوفه من الظهر
وظهرك اشوفه من الصدر
من تيبس اتخضر عشگ
بس للأسف ماتنشبگ
چذبة الوكت وانته الصدگ
واضح يمهجة فاطمه
مدري الارض فوگ السمه
التعلیقات