أنا دوم بخير (مكتوبة) - باسم الكربلائي

 

 

أنا دوم بخير
على راسي الطير
إذا إنته وياي يا خويه

كأن الطير فوك الراس
مثل للهيبه والسطوه
وأحس أني إعله راس الطير
أميره إبعالم الخوه
أنا وإنت إبفرد شريان
خدر ويعانك إمروه
وأنا قبل الأرض قتلك
أروح المشيتك فدوه
" سوُه كون نموت
سُوه بالتابوت
حِلمي وِدعواي ياخويه

يماي الماي صفنت ماي
بين عيونك أو ثغرك
مثل ما تصفن الفرسان
من يطفح زعل صدرك
أعرفك مبتسم زعلان
بس أتباوع الظهرك
أبد ما ينكشف مصباح
اذا ما ينكشف نحرك
مشي إيد بإيد
وأحس إنت بعيد
ملكِت دنياي ياخويه

فرح محزن سمح زعلان سهل مرتاح
لو تصعب تسولف تسكت إتأشر
تمانع تبتعد تقرب تظل بعيوني ذاك اَنت
حبيب اَبكل طبع تنحب
إذا أشرح جزء منك
يبو فاضل صدق أتعب
" إذا جزئك كون
أنا أشرحَه شلون
تره تِصعب هَاي ياخويه

جبير بيوم مولودك
تريد اَخيالي يتحجب
طفل حاضنتك بروحي
وأشوفك أصيد أو أرهب
سؤال الطف سؤال الناس
سؤال الخيمه من تلهب
بلا زينب أكو عباس؟
بلا عباس أكو زينب؟
" إذا إحنَه نرُوح
فلا باِلطف رُوح
نعم إحنَه هَواي ياخويه

يقائد جيش أبو السجاد
وينه الجيش ما شفته
أثاري اَنت يخي قائد
وأثاري الجيش هم اَنت
منو مثلك يلوح الغيم
ولكن ينحني لإخته
يسد وجه الشمس جفك
نجوم الظهر بايسته
" عَذب و مَملوح
جارح و مجروح
ظمَه وإنتَ لماي ياخويه

أذوب ابوجهك الخجلان
بلا تقصير تتعذر
حلاتك لو حجيت اوياك
تدنك و الوجه يحمر
يبو طول اليقصر الناس
الأشم من هيبتك يزغر
يعين الزهره من اتطيح
تطيح عيون للخدر
" إذا وجهَك غاب
وَلاشِي ينَهاب
وأنا كثَرة عداي ياخويه

 

للشاعر: السيد عبد الخالق المحنه