زاير (مكتوبة) - باسم الكربلائي

 

 

زاير    استقبل اضعونك 
رجعن  من السبي عيونك
زينب بالدرب توصل هالايام 
لوعة كربله ولا غربة الشام

الضعن راجع  .. وانه طالع   
مشي من بيتي حتى اوصل  واتانيهم   
قبل جابر .. اجي زاير 
دمعتي طاحت وصاحت  هلا بيهم 
اليتامه اترد .. عله الموعد
الاكيهم اريد وما  الاگيهم 
تعب غربه .. طرُق صعبه
عمت عيني السبي غيّر معانيهم

رايح     بالاربعينيه 
مسبي واتلكه مسبيه 
 محتركه تجي رجلين الايتام 
لوعة كربله ولا غربة الشام 

يبو الاكبر .. اجن خدر
اخذت اوياي كل اهلي   ايتلكوهن 
سوه ايكعدن .. سوه ايلطمن  
بعد ماكو اذا يبجن  يطگوهن 
يتيماتك .. عزيزاتك 
لو بالسوك لو مجلس يدخلوهن 
واذا وكعن .. منو يذكرن
اذا ذكرن اسم حيدر يشتموهن

شافن   بيدي علم شايل
صاحن  وينك يبو فاضل 
ويصيح الكمر منعتني الاسهام 
لوعة كربله ولا غربة الشام 

اذا وصلو .. الك نزلو 
اعاين للضعن شو ما  رجع كله 
الدرب متعب .. بقيت احسب
صفيه ما اجت يمك ولا خوله
مشي وابجي .. وبقيت احجي  
الك يحسين ما ترجع بعد طفله   
شنو احساسك .. على راسك 
رقية حضنت المنحر شنو تكله ؟

بويه   عاين اكو سطره 
بوجهي   تتذكر الزهره 
جفي محترك من حرك الاخيام 
لوعة كربله ولا غربة الشام 

الضعن يوصل .. وانه اعله التل 
اصد من الشمس ذابل  ورد لونك  
يالبوجهك .. منو يشبهك
لكيت الطبره مو زينب عله عيونك 
وره العاشر .. شنو صاير 
بحجر صبيانهم ضلو  يرامونك
برمح ساعه .. بطشت ساعه 
وبتنور هم ساعه  يخلونك 

راجع  متغيره اوصافك 
يابس دمك عله اشفافك 
كل ليلة عطش تعدل الف عام 
لوعة كربله ولا غربة الشام

ابو الباقر .. يجي باجر 
بعد ذاك التعبه كله  اجه بحزنه
اثر كيده .. عله ايده 
انطبع چنه اثر جويه  اشوفنه 
جسد ناحل .. غصص شايل
سكينه وزينب بمشيه  يعيننه
عليل الهم .. وگف مأتم
علاجه شوفة حسينه وعطر منه

بيدي   ماي اخذ بدربي 
يبرد   گلبه برد گلبي 
ما نايم شهر من يوصل ينام 
لوعة كربله ولا غربة الشام 

افتحت عيني .. عله اونيني
واشوفن كربله رايه   بظهر رايه 
وعلي الاكبر .. يبو الاكبر
صعد وينادي يا اهلاً    يمشايه 
فلا تنحب .. بعد زينب 
وبكل شبر من الطف  اكو اقرايه 
ولا يگطع .. ولا يرجع 
ابو الموكب لبو فاضل نطه احجايه 

اسمع   بعيوني  مو بذني 
موكب   يقره  (يسجلني)
بكل حال ووضع تلكانه خدام
لوعة كربله ولا غربة الشام 

ابو صالح .. مشه طايح
منو بكده بجت عينه  على العاشر 
وعد نسمع .. اذا يطلع 
يجي من اخر الدنيه   مشي زاير 
احب جفه .. وركض خلفه 
شيكول المنتظر آنا صحت حاضر 
ابو المأتم .. وريث الدم 
اذا يحجي بعد ماكو حجي الحافر 

ادعي   الله يوفقني 
خادم  للمهدي يجعلني
شاهر رگبتي وتصير الاحلام 
لوعة كربله ولا غربة الشام

للشاعر: حمزة السماوي