إلك قلبي (مكتوبة) - باسم الكربلائي

 

 

إلـك  قلبي انفجع *عبدالله يبني يبني *أحس نحري انقطع *عبد الله يبني يبني
ذبيح  و مارويتك* يصب دمك لقيتك*أحس نحري انقطع* عبد الله يبني يبني

أبـوك حـسـيـن آنـة يـافرح عيدي**و يا جلمة حنان البيها ترديدي
أوِن و أنـحـب و أنـوح عليك يوليدي**الف وسفة أخذتك للذبح بيدي
مـتـت مـن الـظـمـا عبد الله يبني يبني*ترويت بدما عبد الله يبني يبني
يـالغصن الماحويتك يصب دمك لقيتك*احس نحري انقطع عبد الله يبني يبني

شفت  وجهك هلال و بالعطش ذبلان**أخذتك يبني بيك اقصدت للميدان
اوقفت  بين الفزع و الخيل و الفرسان**صحت ياناس رحموا هالطفل عطشان
شـفـت  سـهـم  القدر عبد الله يبني يبني*توجه للنحر عبد الله يبني يبني
يـصيبك  مادريتك يصب دمك لقيتك*أحس نحري انقطع عبد الله يبني يبني

بـسـهم صابوك و المنحر يفيض دموم**خذيت دمك بجفي و القلب مألوم
رمـيـتـه  لـلـسما  و ناديت ياقيوم**احكم بين دم هذا الطفل و القوم
رمـوك  بـهـلـسـهم عبد الله يبني يبني*أحس بية الألم عبد الله يبني يبني
بـجفن دامي بجيتك يصب دمك لقيتك*أحس نحري انقطع عبد الله يبني يبني

رجـعت للخيم بيك و جمرتي بصدري**و دمك على ذراعي يسفح و يجري
الرباب أمك شلون أخبرها ماادري**هون ثلثين من حيلي و ثلث من صبري
رحـت صـوب الـخيم عبد الله يبني يبني*نطيتك للحرم عبد الله يبني يبني
و  عساني لا نطيتك يصب دمك لقيتك*أحس نحري انقطع عبد الله يبني يبني

نـطـيتك للفواطم و النحر مقطوع**عليك اجتمعن بنوح و نحب و دموع
غدن كل وحدة تنعاك بقلب مفجوع**بس صوت النحب و النايحة مسموع
اجـن لـك بـحـزن عـبدالله يبني يبني*طفح موج الجفن عبدالله يبني يبني
بدمع  جاري نعيتك يصب دمك لقيتك*أحس نحري انقطع عبد الله يبني يبني

اجـن و اجـتـمـعن كل الحرم يمك**وحدة من وريدك ياوليدي تشمك
و  وحـدة  تصب دمعها و تمسح بدمك**و أمك حايرة و بس تلهج باسمك
الـعـقـل مـنها انفقد عبد الله يبني يبني*تصد على المهد عبد الله يبني يبني
و تقلك حين اجيتك يصب دمك لقيتك*أحس نحري انقطع عبد الله يبني يبني

هـي أمـك يـا عبد الله غدت تنعاك**تنوح و خضبت جفها بمسيل دماك
تـقـلـك ريـت وافـاني الأجل وياك**و ريت السهم ارداني و لا ارداك
شـفـت  دم ركـبتك عبد الله يبني يبني*دهتني مصيبتك عبد الله يبني يبني
لرسول  الله هديتك يصب دمك لقيتك*أحس نحري انقطع عبد الله يبني يبني

 

للشاعر: الأديب الحاج جابر الكاظمي