بكت عيناي مولاها (مكتوبة) - باسم الكربلائي

 

 

دماء كيف ننساها
اسيلت من بني طه
حسيناه.....ثار الله
ثار الله.....لا ننساه

ريت لا عشت بحياتـي
و ريت لا ولدتني امي
و لا اجي الهالدنيا و اسمع
جسم ابو السجاد مرمي
اشلون دم احسين يجري
و آنه ضل محفوظ دمي
ريت ذيج الخيل اجتني
و كبل جسمه اتدوس جسمي
حياتي لست ارضاها
اذا ما العز يرعاها
حسيناه.....ثار الله
ثار الله.....لا ننساه

هذا واقع دوم أعيشة
هذا مو تعبير شاعر
لون تنعاد الليالي
ترجع الطف و العساكر
و اسمع أصوات أبو اليمة
ينادي و يريد المناصر
للذبح نحري أقدمه
من كَبل منحره الطاهر
حروف الطف اهواها
لأغدو من ضحاياها
حسيناه.....ثار الله
ثار الله.....لا ننساه

صفوة من فتيان غالب
سجلت بالدم قيمها
ريتني ابذيج الملاحم
جنت بالميدان يمها
أمضي وياها و أشارك
بالمعارك و أجلي همها
و أفتدي بروحي و حياتي
كبل ما ينسفك دمها
دماء فوق بوغاها
نداء الحق أجراها
حسيناه.....ثار الله
ثار الله.....لا ننساه

هذا أشرف دم تفايض
علأرض من آل غالب
تشهد الهم ساحة الطف
راوَو الدنيا العجايب
شرعوا سمر العوالي
شالوا أطراف الكتايب
صفوة ما تحصل مثلهم
خلدوا أشرف مناقب
رست للعز أشلاها
و بسم الله مرساها
حسيناه....ثار الله
ثار الله....لا ننساه

كل نحر منهم يوهج
للعدل و الخير شمعه
صوتهم لليوم يدوي
كل غيور و حر يسمعه
يصرخ الناعي باسمهم
و ابلهيب الحزن ينعه
لون ليل انهار نجري
الدمع ما تنفع الدمعه
نفوس في مناياها
لسان السبط ينعاها
حسيناه.....ثار الله
ثار الله....لا ننساه

كربله ما جنت حاضر
بعد ما ضل أمل عندي
لابد اتعود الليالي
و نستمع صرخة المهدي
يرفع السيف بيمينه
ينادي يا ثارات جدي
و تمشي ركبان المنايه
سيفه بالارواح يحدي
بكت عيناي مولاها
و فقد السبط ابكاها
حسيناه.....ثار الله
ثار الله...لا ننساه

 

للشاعر:جابر الكاظمي