هالدنيا عاشت (مكتوبة) - باسم الكربلائي

 

 

هالدنيه عاشت كلها ابخيالك
ومن دمك اخذت صورة جمالك
يحسين الك أوصاف .. محد مثيلك شاف

ابمقادير وصور تزهي جمال العالم اتقسّم
بعض من عدها شفافه و بعض باللمس تتجسم
و بعضها ابنغمه مسموعه وتيره وبيها نتنغم
ولون ردنه نقسمهن نشوف لكل حسن معلم
شمس وامواج سحريه ومفاتن لمعة المبسم
بس حسنك يبو الأكبر تلوّن من مسيل الدم
ابكل صوره تزهي مرسومه ذاتك
ابساعة مماتك تبدي حياتك
يالعالمك شفاف .. محد مثيلك شاف

بعد أكثر أريد أدخل واخوض ابعالم القدره
دخلت ابروضه نفّاحه واجتني اعله الورد فكره
شفت بين الزهور الوان كل لون ابوجه زهره
وحين اتمعنت بيهن جذبت ناظري الحمره
ذكرتك واذكرت دمك التطافح موجه عالغبره
مثيلك ما شفت مذبوح يلون الزهره من نحره
كل زهره حمره تزهي ابغصنها
دمك يلون صورة حسنها
يا مصدر الألطاف .. محد مثيلك شاف

وبعد أنقل الك صوره ابجمال الشمس من تطلع
حَمَار الأفق يرسمها وبعدها بفتره لن تسطع
ولون وكت الغروب ايصير تجدد حُمرة المطلع
اسألت أهل الفلك گالوا يهالتنشدنه هاك اسمع
حَمَار الشمس دم حسين عله افق السمه اتوزع
وصبح حلقة وصل دمك بين الشمس و المصرع
هاي العوالم محورها جسمك
‏ وشمس المعالي خضّبها دمك
وابحكم الاستكشاف .. محد مثيلك شاف

بعضهم يجعل اوصافك خيال ايصوّره الشاعر
لجن عين الحقيقه اتگول جمالك قدرة القادر
الدليل ايثبّته المصرع او يوضحه خصمك الغادر
يمن كلمن گصد ذبحك وسيفه ابيمنته شاهر
بس ما يوصل لجسمك او يصد لوجهك الطاهر
تشغله هيبة اوصافك ومحاسن نورك الزاهر
نورك يخيب طيفه وظنونه
ولگومه يرجع يعلن جنونه
يمجنن السيّاف .. محد مثيلك شاف

ضميري ابحبك اتحرر ولساني اتطّهر باسمك
ولون شفت البحر هايج أذكر زودك وعزمك
رمز وابجبهة الأفلاك يحسين انطبع رسمك
أثير وما گدر واحد يشخّص عالأرض جسمك
لا شك حُمرة الياقوت لوّنها نزف دمك
شمس حكمه واهل بيتك نجوم اتصرّعت يمك
ابعالم شعوري شفت المناحر
من عدها تجري سيول الجواهر
باقي البشر أصداف .. محد مثيلك شاف

غريب و عالمك أغرب الخالق ما خلق مثلك
استقر اعله العرش ربنه ومن نوره جعل اصلك
ابكل ما خلق من مخلوق ما ظن ربك ايبدلك
عدالة خالق الأكوان من عدها انفرز عدلك
العقل ما يرضه يستقبل صور عن ذبحك وجتلك
تموت اشلون و الدنيه خلقها الباري من أجلك
لحزنك تفصّل ثوب الليالي
گطعة وريدك عالم خيالي
وابعالم الأشراف .. محد مثيلك شاف

الخالق من لطف ذاته يبو الأكبر فرز لطفك
ولمن خلق هالدنيه بدت تكتسب من وصفك
جمالك للبشر واضح وكلمن شافك ايعرفك
بحر والشمعه ما تگدر ابحرارة نارها اتنشفك
لون شفت المطر ينزل أذكر جودك وجفك
ولون شفت الغصن محني أذكر طيبك وعطفك
يا من لسانك كنز الفصاحه
وراحة يمينك بحر السماحه
يا مجمل الأعراف .. محد مثيلك شاف

 

للشاعر : جابر الكاظمي