يالمهدي عندك خبرهه (مكتوبة) - باسم الكربلائي

 

 

يالمهدي أمك فاطمه عندك خبرها ‏
دلينه وين إبيا كتر صاير قبرها
علي إبخفيه دفنها .. نسالك و إنته بنها

سؤال اليجرح الخاطر نرفعه
نتأمل جوابه
جوابه انريد من عندك نسمعه
يا نسل النجابه
كضينه العمر دمعه اتواسي دمعه
عله الباب و مصابه
باب الرحمه معناها اليدفعه
كفر بالله و كتابه‏
بضعة محمد فاطمه نور العقيده ‏
لاذت وره الباب الستر جانت تريده
سكن بالعصره ونها .. نسألك و إنته بنها

وديعه فاطمه ودعها أبوها
كبل ساعة منيته
رسول الرحمه وصه و ما رعوها
ما سمعوا وصيته
الآذوا بضعته من اعتنوها
غايتهم أذيته
سإلتهم لجن ما جاوبوها
يا ذنب الجنيته
هالدار جان المصطفه لمن يجييها ‏
من بضعته يطلب إذن و يطب عليها
النبي يطلب إذنها .. نسألك و إنته بنها

على كل النسه الباري إصطفاها
بت سيد البريه
رضه الرحمان مقرون ابرضاها
سماها الرضيه
الله يلعن السنوا أذاها
راووها الأذيه
و لكوان بأرضها و بسماها
ناحت للزجيه
من المدينه ابيا ذنب من طلعوها ‏
صبح و مسيه ما رضوا تبجي اعله بوها
بِنت بيت الحزنها .. نسألك و إنته بنها

يغايب أمك الكسروا ضلعها
غيرك من يجبره
فوق الوجن دم هلت دمعها
العين الغدت حمره
موقف حيدر الأكثر فجعها
من صاحت ابعبره
وشقال الوصي لمن سمعها
و امجتف ابصبره
والله لو ما كيّده حبل الوصيه ‏
حيدر قلب وجه الثره فوك الثريه
و أبد ما سكت عنها .. نسألك و إنته بنها

يمهدي الكون كله بانتظارك
يبو الطلعه البهيه
الحرق دار أمك ايوجر ابدارك
نار الطائفيه
بعد كافي الصبر صدر قرارك
يا راعي الحميه
من أهل السقيفه إخذ ثارك
زمرة آل أميه
إيد الجريمه الخانت الأمه و شرعها ‏
يبن الحسن حان الوكت واجب قطعها
تون البضعه منها .. نسألك و إنته بنها

جواب إبن الحسن و الدمع جاري
صعب روحي صبرها
البتول أمي الزجيه بإنتظاري
تريد أجبر كسرها
يشيعه و آنه كل ليلي و نهاري
كاعد يم قبرها
بجفوف الأمل أندب الباري
و الساعه أنتظرها
من بعد ما صفي اويه عدواني حسابي ‏
كلمن سأل من شيعيتي يسمع جوابي
مته اتكحل جفنها .. نسألك و إنته بنها

جمر الثار بضلوعي لهيبه
كل صبح و مسيه
صبري اشلون و أنسه يا مصيبه
و يا ونه خفيه
أنسه جثت حسين السليبه
برض الغاضريه
لو عمتي المهضومه الغريبه
المشوها سبيه
من صدر جدي حسين أريد آخذ رضيعه ‏
عباس عمي أنشد عله اجفوفه القطيعه
عله الضربوا متنها .. نسألك و إنته بنها

للشاعر : سيد سعيد الصافي