من الأزل باللوح مكتوب (مكتوبة) - باسم الكربلائي

 

 

من الأزل باللوح مكتوب .. شيعي 
صبري اعله حبكم صبر ايوب .. شيعي
حزني الفرجكم حزن يعقوب .. شيعي

شيعي و الينشدي عن سر انتسابي
من صلابة موقفي ياخذ جوابي
صابر و متحمل همومي و عذابي
الله واعدني بثمن اجري و ثوابي
جنة عدن يامن تسألون .. اجري
و بحب علي الكرار مضمون .. اجري
و الصادق اهل البيت منسوب .. شيعي

ربي كرّمني بوجودي و من عليه
خصني من فاضل الطينة الهاشمية 
و امتحني بحب اهل سيد البرية
انتسابي الجعفر الصادق هوية
افضل و اشروف كل الأديان .. ديني
منهاجه يحفظ حق الانسان .. ديني
و انه اعله هذا الدين محسوب .. شيعي

انه من يوم الصحت حيدر اميري
اعلم ابرد الفعل و اعرف مصيري
مؤمن بحب الوصي و قانع ضميري
شلون اخاف و علي بكل شدة نصيري
ادري بولائه الثمن يا ناس .. غالي
تاج الكرم اليرفع الراس .. غالي
ادري العدوي راسي مطلوب .. شيعي

علي الما صاير و لا يحصل قرينه
و اللي ما بايع علي منقوص دينه
قبل ما يرفع رسول الله يمينه
صحنه من قلب و لسان مبايعنه
اول خليفة و محور الدين .. حيدر
نص و نزل من الله تعيين .. حيدر
لو انذبح من حبه ما اتوب .. شيعي

هذا شان الرايد ايعشي ابكرامه
كل مرامه يوصل الجرف السلامة
و بسلامة قلب يوصل بالقيامة
يصبر و ما يهتم الحجي الملامة
لو ينكضي ابحسرات و الآلام .. عمره
يثبت ولائه بطيلة آيام .. عمره
و يصيح بيه المثل مضروب .. شيعي

انا شيعي و جعفر الصادق امامي
محنتي من تكبر يزود اعتصامي
عالمذاهب كلها امتاز بمقامي
و بسلامة مذهبي و دوري التزامي
صاحب عهد للموت ما أخون .. عهدي
بالدم كتبته و دمع العيون .. عهدي
و ابقه اعله جذع الصبر مصلوب .. شيعي

من اكول الكربله انه أنتمائي
لازم اثبت موقفي و ارخص دمائي
من وفاء انصار ابو اليمه وفائي
حتى دنيه و آخره اضمن بقائي
من اجل حب حسين لو سال .. دمي
يصبح نشيد الكل الأجيال .. دمي
و بكل زمان اليمر محبوب .. شيعي

 

للشاعر : السيد سعيد الصافي الرميثي