مهلاً يحادي الضعن (مكتوبة) - باسم الكربلائي

 

 

مهلا يحادي الضعن خلهم يودعوني
راحت رقيه اشعجب و آنه يخلوني
نار نار ...غربتي...نار نار دمعتي...و آنه يخلوني

أودعهم وداع ابلايه رجعه
تعال إسمع عتب دمعه إعله دمعه
أنا إبعيني تره ضاقت الوسعه
شقول و صوت أبويه ما أسمعه
مره أعتب إعله الزمن مره أعتب إعليهم
كون إبسلامه هلي يا روحي عذريهم
نار نار علتي...نار نار دمعتي...و آنه يخلوني

رقيه إتروح ليش و أبقه آني
و أصيحن يا هلي بتكم تراني
تعالوا إشقد صحت محد إجاني
بعد شكثر يراواني زماني
أدري إذا سافروا محد يدق بابي
و اللي تركني و مشه يتحمل إعتابي
نار نار وحشتي...نار نار دمعتي...و آنه يخلوني

جنت محسوده وي أهل الحميه
ابويه ابكل وكت يسأل عليه
علي الأكبر يجي و بيده هديه
و انا و عمي القمر نقعد سويه
يوميه عمي القمر لازم يجي يمي
يالحادي و إبشوفته ما أشعر إبهمي
نار نار حسرتي...نار نار دمعتي...و آنه يخلوني

يحادي و هاك إخذ هاي الوصيه
سكينه و خل تنفذها إليه
تمد إفراش ابويه إبكل مسيه
و تبوس إبمنحره بالغاضريه
وصيها من يبتسم عبدالله تذكرني
أشعر بعد ما يجي وين اليصبرني
نار نار حيرتي...نار نار دمعتي...و آنه يخلوني

يحادي لو شفت تلتم العيله
تروح القمر هاشم تشتكي له
تقله شو نسيتوا هالعليله
تظل تتأملك ليله إعله ليله
بلكت يرد لي القمر من يسمع إعتابي
عمي حنين و أبد ما يرضه بغيابي
نار نار قصتي...نار نار دمعتي...و آنه يخلوني

إذا ناموا تنادي يالتنامون
عليلتكم تغمض إعيونها إشلون
تنادي يا هلي يمته ترجعون
إذا ما شوفهم ما ريد العيون
عطشانه ما أرتوي من يوم فرقاهم
ما أظن يمسهم ضمه و عباس وياهم
نار نار لهفتي...نار نار دمعتي...و آنه يخلوني

عفت لحظات عيني و شفت الأهوال
أشاهد روس فوق إرماح تنشال
شفت جود و علم و إيمين و إشمال
طشت شبكت رقيه و لمت أطفال
راس إبطشت شافته نامت فرد نومه
مظلومه آني و رقيه مظلومه
نار نار صيحتي...نار نار دمعتي...و آنه يخلوني

 

للشاعر: السيد عبدالخالق المحنّه