رجعهم إليه (مكتوبة) - باسم الكربلائي

 

 

يا رب لو دعه عبدك إلك وحدك تجيبه
يا من رجعت يوسف يا إلهي من مغيبه
رجعهم إليه ...يا رب البريه

وحق اللي وصل قوسين أو أقرب
و حق اللي قلع باب و شطر مرحب
أضحي الأربعه و إبدمهم أتخضب
و يعود حسين سالم للوطن يا رب
يا من تسمع الشكوه أنا أم و غريبه
إشحال الينتظر رجعه ولا يرجع حبيبه
بالزهره الزجيه...يا رب البريه

أنا الربيتهم و أتأمل يكبرون
قلت وكت المشيب أحبابي ما ينسون
أخاف امن الحسد كل خوفي ينحسدون
أقره القل أعوذُ لمن إيمرون
غيبتهم عليّ طالت ولا بانت علامه
مـا أدري بعد صبري يعودون إبسلامه
راووني المنيه ...يا رب البريه

إفراق حسين قبل الشيب شيبني
بنيت وفوق راسي إتهدم المبني
يدق بابي الهوه وأركض و أقول إبني
و أصيح اهنا يا يمه و ما تجاوبني
تعال وخل أشوفنك و أشمنك و أعاتب
يالرايح بعد عينك ولا ظلت حبايب
من يسأل عليه ...يا رب البريه

آنه الوالده و من يشعر إبحالي
غير أم الغريبه الفاجده الوالي
روحي إبجالهم ترتاح حسبالي
تاليها غريبه و بيتي ظل خالي
لو أسمع رجع غايب قلت بلكت يجوني
لو أيس و اظل أحسب ولا قولن نسوني
و شيحصل بيديه ...يا رب البريه

أمس مر طيفهم يا ريت ما شفته
جسم فوق الثره و الخيل ساحقته
بلا ما شوف راسك قلت هذا إنته
ييمه حسين قلبي ليش عذبته
يالجسمك يقطعونه و أنا بيدي ألمه
و إخوانك أناديهم تعالوا إهنا ييمه
أدعي إبكل مسيه ...يا رب البريه

عفت جسمك ييمه و دمعتي بالعين
قلت عباس وينه إشلون عاف حسين
قبل لا شوف إبني شاهدت جفين
يخو زينب صحت حاجيني زينب وين
صوبني سهم عينك ردت موتي إويه موتك
جاوبني يضي عيني أسألك وين إخوتك
وين أهل الحميه ...يا رب البريه

قمت مرعوبه يبني و دمعتي إبعيني
و أسمع صوت إبن حذلم يناديني
سألته و قال عن ولدج تسأليني
ناديته إعله أبو السجاد حاجيني
جاوبني إنقطع نحره بقه جسمه رهينه
راسه إعله الرمح عالي و تباوع له الحزينه
قادوها سبيه ...يا رب البريه

بعد ما أنتظر و أسأل عله أحبابي
ولا أركض بعد للي يدق بابي
يروحي ايست متعود غيابي
و لا هذا الجنت حاسبته بحسابي

 

للشاعر : السيد عبد الخالق المحنه