نوحي يا زينب (مكتوبة) - باسم الكربلائي

 

 

قبل الأرض ناح العرش والسبعه
نوحي يزينب هذا يوم الدمعه
و اللي ترك جراحه .. يستاهل النياحه
يزينب يزينب

ودعي يزينب صبرج إويه البضعه
و الودّع أمه يا دموع إتنفعه
يا زينب الراح إبنعش شيرجعه
يبچي الحسن وحسين يبجي وينعه
دارج خليه و موحشه هالليله
واليفگد أمه من زغر يا ويله
واليرحل بصباحه .. يستاهل النياحه
يزينب يزينب

يم الحزن عمر الورد عمرها
بين المدامع و الجرح ذكرها
تركت إلج ونه و ألم كسرها
تركت عبايتها و أثر عطرها
إمصلايه تركت لج تصلي إعليها
إنتي الوريثه و لازم إتمثليها
واليحمل السماحه .. يستاهل النياحه
يزينب يزينب

لازم سمعت إمن إنكسر ضلعها
محسن جتيل و منظرج فجعها
أسأل يزينب حيدره سمعها
من صاحت وجف النذل صفعها
لاذت وره الباب وحمت خدرها
عالحايط الظالم إجه وعصرها
والينكسر جناحه .. يستاهل النياحه
يزينب يزينب

بيمن توصيج العزيزه الحره
گالتلي و إتهل المدامع عشره
بالطف أخوج حسين قبلي صدره
قدميله سيفه يالعقيله و مهره
گالت إخوج حسين يبقه ضامي
و أكبر مصيبه ينذبح گدامي
تسجد عليه رماحه .. يستاهل النياحه
يزينب يزينب

وصتني لو عباس ما رد لينه
روحي ييمه و قبلي جفينه
إنتي إعذريه خل تعذره إسكينه
و بهيده طلعيله السهم من عينه
لو شفتي جوده ويمنته ويساره
كفي العتب و إتقبلي إعتذاره
وإبجي بلايه راحه .. يستاهل النياحه
يزينب يزينب

گولي يزينب آخر الوصيه
بيمن توصي فاطمه الزجيه
گالتلي وصتني على رقيه
طفله ويتيمه و عالهزل سبيه
لو رادت إتشوف الإبو ودعوها
ميته ييمه إعله الطشت تلگوها
والميت ابمناحه .. يستاهل النياحه
يزينب يزينب

خلي يزينب للطفوف الحسره
لمن إخوج حسين ينحز نحره
و إخيامج إبنار الحقد مستعره
و إنتي يمدلولة علي متيسره
راس الحسين إعله الرمح يبرالج
يزينب إهناك الحزن يحلالج
جرحي إنسمع صياحه .. يستاهل النياحه
يزينب يزينب

 

للشاعر : السيد عبد الخالق المحنه