قلبي كتاب (مكتوبة) - باسم الكربلائي

 

 

للأحزان گلبي كتاب
تقره مصاب بعد مصاب
راحولي طفلين .. صابوني سهمين

هاي امك الوديعة واسمعها شتگول
لو عاتبت عتبتها يالغايب يطول
بالرحمة للبرية والدها مرسول
والظالم الظلمها عن ذنبه مسؤول
كل ماراد يبدي اعذار انسى شلون حرگ الدار
ظلموني بثنين .. صابوني سهمين

والما رعوا حجابي شرهم بالعيون 
هجمة عدو اعله داري گصدوا يهجمون
عن كل حقوقي اسكت من عندي يردون
بَضعة مُحمد آنه وكلهم يعرفون
هاي الناس ناس أوغاد عدها گلوب كلها أحقاد
شلّهم علَيّ دين .. صابوني سهمين

عنهم ردت ملاذي من اجل الحجاب
يالغايب اعله صدري من دفعوا الباب
صابوا گلب جنيني وي گلبي الانصاب
والمحسن الفجعني دم دمعي سچاب
طفل الطاح كوكب نور عمره الچان سبع شهور
مني خَذه البين .. صابوني سهمين

دار الوحي الإسمها مشكاة الأنوار
للهادي والرسالة مستودع أسرار
يستأذن بدخوله من يُدخل الدار
وبلا خجل أجوها دخلوها الأشرار
يابو حسين صحت بصوت خلف الباب شفت الموت
عني رحت وين .. صابوني سهمين

عن الأعادي ستري من عندي مطلوب
گبل الضلع جنيني حسيته مصيوب
عالحايط العصرني دم صدري مخضوب
ما تنقبل له توبه لو رايد ايتوب
اشكي الحال للمعبود عالظلاّم عندي اشهود
عن ضلعي والعين .. صابوني سهمين

يامن ردت تناشد عن بيت الأحزان
عالمحسن ومصابه كل الحزن چان
سوط العدو اعله متني من عنده نيشان
وعيني الذي طفاها عن هضمي برهان
ماتنزال بيه جروح والمهضوم طبعه النوح
فجعوني مرتين .. صابوني سهمين

أول جرح جنيني من بين الجروح
وبلوعة انتظاري والمحسن ايروح
ثاني جرح جعلني ما أگطع النوح
ظامي الچبد و اشوفه عبد الله مذبوح
لو هليت دم ودموع بيد حسين شفته يلوع
وبطفل الحسين .. صابوني سهمين

ماينوصف شعوره مجروح الإحساس
مثل الزمن فجعها هم شفتو يا ناس
چبد ابطشت اشوفه وفوق الرمح راس
والأثر ابدليلي جرح ابني عباس
واخته تصيح گلبي احتار گوم وشوف خيل ونار
من عدنه چفين .. صابوني سهمين
للشاعر :سيد سعيد الصافي