حقي لو أفقد وقاري بجمعة (مكتوبة) - باسم الكربلائي

 

 

حقي لو أفقد وقاري بجمعة الوحشه
صاحب السجدة الطويلة عالجسر نعشه
يجري دمع الفاتحة عالجسر وقت الضحه

الدنيه منها شرتجي غير الأذية
بس هجر و افراق واوداع و منية
ما تفاجئني إذا جارت عليه
حالفت هارون ضد ابن الزجية
و السجن طامورة ظلمه و محد يشوفه
كتبت الحيطان يمته من دمه اجفوفه
و الفرج و النايحة عالجسر وقت الضحه

و القرب منه الأجل يكثر حنينه
عالأخو و اعله الإبن مشبوحة عينه
هزت أركان العرش نغمة ونينه
و ندري بالسجان ما يرحم سجينه
رايد اليوث الهواشم تحضر بموته
اتشيعه و فوق الأصابع يمشي تابوته
عينه ظلت شابحه عالجسر وقت الضحه

دمعة المشتاق تجوي و بيها ذكره
من تمر الذكريات ايضيق صدره
و السجين اليذكر أحبابه اشيصبره
ينتظر موته و يخاف يطول عمره
ينفطر قلب الغريب اليذكر اوليده
ما سمع أخبار عنه و شوفته ابعيده
هالكلام انوضح عالجسر وقت الضحه

تسجد الحيطان من يبدي بسجوده
من صده التسبيح تتعذر قيوده
هوه صح مسجون بس دايم وجوده
و الفناء ايصير لإبليس و جنوده
موتت الغربة هضيمة و تكسر الخاطر
بن سويد الفرج قرب و الوعد باجر
هالإشارة الواضحه عالجسر وقت الضحه

يا سراج الباري و بظلمة احتجازه
و اليموت بغربته يذكر إعزازه
و الله هاليوم العشيرة إلها عازه
أربع احماميل شالوها الجنازة
من كشف جسمه الطبيب و بانت أخباره
ناده لو عنده عشيرة تطلب بثاره
كلمة جانت جارحه عالجسر وقت الضحه

يحله فوق الجسر دمع الجعفرية
حضروا التوديع إمام الرافضية
هوه عنده العيشة و الموتة سوية
يدري هنَّ اثنيهن تحت الوطية
و الذي تخلص حياته بظلمة الحفرة
يعني حرية ايحسبها من مشه القبره
حتماً الموت استحه عالجسر وقت الضحه

سيدي أنصارك المليانة غيره
طلعت اتشيل النعش بأكبر مسيرة
نذكر حسين البقه بحر الظهيرة
ابلا دفن و امذبحه اوياه العشيرة
عاري عالغبره يويلي امقطعه أوصاله
عالرمح مرفوع راسه و تنظر اعياله
قارن بهالمذبحه عالجسر وقت الضحه

 

للشاعر : سيد عبدالخالق المحنة