أبلغك سلامي (مكتوبة) - باسم الكربلائي

 

 

 

أبلغك سلامي .... و انا بلا محامي
گبل لا أمشي عنك
يا ابو الغيرة أطمنك
و انا بلا محامي

هدأ ليلي و بقى صوتي الذي ينحب
سكت حتى الهجير البالخيم يلهب
إجيتك يا گمر ليش بدمه مخضَّب
و احس تگلّي رحمي بحالي يا زينب

أواعد همومك ... بعد ما ألومك
إلي لا يعله ونَّك ... يا ابو الغيرة أطمنك
و انا بلا محامي

إجيتك عالنَّهر عباس محنية
إجيتك حيث أدري ما إلك جية
الحرگ ما أگول ما خله خيم ليه
أظن شميت دخان الخيم بيه

حرگو كل خيمنه ... و لا رف علمنه
بعد خل يغفه جفنك ... يبو الغيره أطمنك
و انا بلا محامي

إذا عندك بعد نية و تريد تگوم
يخويه شناطر أكثر ؟! ذبحو المظلوم
أسولف عن رضيعه البالسَّهم مفطوم
لو كافي أجيب گماطه كلّه دموم

بعد خل أزيدك ... ترضرض عضيدك
بحوافر ما إجنَّك ... يبو الغيره أطمنك
و انا بلا محامي

تطمن يالگلت شيصير بغيابي
عگبك خويه آنه بخير بمصابي
أروح ويه العده و ما اسمعك عتابي
ألبس رايتك لو سلبو حجابي

أروحن سبيه ... و لا تفزع إليه
مصابي لا يحزنك ... يا ابو الغيره أطمنك
و انا بلا محامي

تطمن عالخدر يلّي گلت بحماي
الخدر آنه التركته و ما أريده وياي
أريد اركض و اريد اتعثَّر بممشاي
و المَّ ايتام تشرد من سياط عداي

أباري الضعينة ... و أيس تجينه
تجينه ما أظنك ... يا ابو الغيرة أطمنك
و انا بلا محامي

تطمن يالچنت تمسح دمع عيني
شما أبچي تسكَّتني و تواسيني
نام برغد و آنه بونَّي خليني
أكو اللي بلطمه صار يسكَّت ونيني

و اناطر چفوفك ... لچن ما أشوفك
و لا تدري كأنَّك ... يا ابو الغيرة أطمنك
و انا بلا محامي

تطمن لا تگول : بضعني من يحدي ؟!
الشمر موجود و آنه من أمشي مو وحدي
لكن گبل ما اردَّ لوطن جدَّي
وگفات بدواوين الزلم عندي

الجبتهه أميره ... عفتهه أسيره
عدوك يحدي ضعنك ... يا ابو الغير أطمنك
و انا بلا محامي

الحچي قاسي لچن گلب الأخت معذور
أطيب خاطرك بس خاطري مكسور
على چفوفك يا ابو فاضل ألف مشكور
و انا گدَّ الكفالة و استحق هالدور

تراني العقيلة ... أصيرن كفيلة
تعلمت آنه منك ... يبو الغيره أطمنك
و انا بلا محامي

 

للشاعر: علي السقاي