أنا العباس (مكتوبة) - باسم الكربلائي
منذ ١٠ أشهر١٨٩مشاهده|1
لطمية أنا العباس مكتوبة
الرادود باسم الكربلائي
عتب يغفه عتب يصحه
اخوچ وارحمي بجرحه .. أنا العباس
انزل راسي من رمحه
اكاسر ليلچ بصبحه .. انا العباس
و اذا تردين اجيچ الحين
دخيل الله شكثر طيفي إعلى جفنچ هام
ردت نتلاگه لو ساعه برؤى و احلام
الرغد شح و بگت عينچ على الايتام
ليالي و سهرچ مواصل مع الايام
ادور عن فرد غفوه بجفن منضام
ولگيت من التعب فرصة و أخيتي تنام
اجه بحلمچ ابو فاضل
دشوفيني گمر كامل .. بجميع اعضاي
تراني من العرس حاصل
لقب اعظم و اجل كافل .. دريتي بهاي
و لجل ترضين اجيچ الحين
اجيت بليلة الوحشه بهدوء الليل
عتابچ يفطر السبعه و يهد الحيل
شنو تگليلي ما ادري بهجوم الخيل
و انا روحي تفر يمچ على الـ يا ويل
اسمعي و اختصر حچيي بلا تفصيل
گبل لا غفوتچ تگضي بدموع تسيل
و حگ اية الم نشرح
ترى اعتابچ ألم يجرح .. يحز بالروح
الچ اسبابي تتوضح
عليمن جسمي بالمذبح .. بگى مطروح
لو تعتبين اجيچ الحين
الچ خل اختصر وضعي باقل احروف
اسولف و انتي سمعيني و بعدها انشوف
چنت ع المشرعه مسيطر جنود الخوف
اذا بس لوحت سيفي تطيح اسيوف
شفت عزريل اجه يمي بدمع مذروف
يقلي خالقك شاءك بليه چفوف
ملك عالي انحه بدربي
تحتم ينگضي نحبي .. الأمر لله
يحب ايدي يحب جنبي
استحيت استغفرت ربي .. رحت وياه
شنو تگولين أجيچ الحين
القدر لو ما نزل أمره و إلهچ راد
ابد ما ينحمل راسي على المياد
اگص رجله الذي يگرب لبو السجاد
عمر بن سعد اذب راسه على إبن زياد
اصير اية بلسان الطف تضل تنعاد
ترتل ان عباساً لبرمصاد
شمر بوجودي خل يطلع
شنو يحرگ اريد أسمع .. يگول إخيام
لخلي بناره يتلفع
و انا ابن الفارس الأنزع .. اتركه إعظام
من اتأشرين اجيچ الحين
رضيت بما كتب ربي و جرالي و صار
يزينب و الأمر يمچ فلا أختار
نعم بالخوه والدنا علي الكرار
لچن انتي أمچ الزهرة و إلچ أسرار
الچ ويه السماء شچم حديث و دار
و انا تحت أمرچ و أنطر شنو الأقدار
اذا ردتي اعيد الطف
أجيچ بلايا جسم و چف .. فقط هالراس
اخلي من الرمح يلتف
رگاب أخنگها صف بصف .. اسد انفاس
بلايا چفين اجيچ الحين
اعلى ايدچ يا اختي يا زينب انا تربيت
و اعرفچ واجب الطاعة من اهل البيت
الخلايق كلها صنعتكم و لا شكيت
و انا الخادم يمولاتي و إلچ لبيت
فقط رفعي القدر عني و اسمعچ صيت
و مو ام البنين امي اذا ما جيت
القدر خل يرتفع ساعة
اجيلچ سمعاً و طاعة .. افزع الموت
العدو و بحاله مرتاعه
گبر يحفر إله بگاعه .. بعذاب يفوت
اعلى رغم البين اجيچ الحين
قبل مايرتحل طيفي وحزين ايروح
قبل ما يغرگ بعبرة بدمع مسفوح
وداع و نتفق يختي كفايه إجروح
عتب ماريد اريد اسمع يخي مسموح
دگومي و للسهر خلي الجفن مفتوح
يا زينب فزي من نومچ رقية تنوح
عيونچ خل ترد تسهر
على اطفال وعلى الخدر .. تباري إعيال
وعد مني يابت حيدر
حلم ثاني و بعد أكثر .. بليالي اطوال
فده الـ هالعين اجيچ الحين
للشاعر : علي السقاي
التعلیقات