أزورك (مكتوبة) - باسم الكربلائي

أزور قبرك أرجو منك لو نظرة
فاذن امامي ان آتي الى الحضرة
اسري اليك بعطفي منك ﻻ قدرة
من ذا أكون لكي امشي الى السدرة
أزورك .. والزّياره واجبه لو بالعمُر مرّه
أزورك .. و الزياره أدري
ابألِف حَجّه او ألِف عُمره
أزورك .. واليزورك
ينحسب أجره عله الزّهره

اليِحِج بيت الله كون ابحَجَّه ينوي
او يقصِد القُربى
وأنا ابهاي الزّياره قاصد القُربهْ
لـذوي القُربىٰ
أنا عبدك شِهَد بسْمك دليلي
والگلب قَرْ بَـهْ
لْجوارك إسمح لگلبي ايتدنّه
او منزلي قَربَه
دخيلك .. خادمك ، عبدك
يتيمك ، لايذ اِبْـسَـدَّك
دخيلك .. لا يمُر يوم أربعينك
و آنه مو عندك
دخيلك .. هالوعـد لحظه
اعله لحظه عايش أنتظره

الْيِـحِـجْ ينزَع مَخيطه او فَلْسَفَـتها
ينزَع اذنوبه
اْو مثِل إحرامه يجعَل گلبه أبيض
هذا مطلوبه
لچَن كِل مَن يجيك اِحرامه أسْوَد
و الحزن ثوبه
اْو زيارة گبرك اسرَع كل طرُق
للرايد التوبه
طريقك .. لليريد الله
يحبّه او يقضي حاجاته
طريقك .. يمشي بيْـه المهدي
حتماً ويّـه عمّاته
طريقك .. للذي رايد يواسي
زينب الكُبرىٰ

الْـيِحِجْ يجمَع حَصَه والغايه منها
يرمي شيطانه
اْو حصَه الزّاير دُموع اعيونه يرمي
بيها عدوانه
اليحارب هالمشي او يعلِن عِـداءَه
بيده واِلسانه
تحَت أقدام كل زاير مصيره
تالي وامچانه
إجينه .. او هاذي مَشْيَـتـنه
رساله لليعادونه
إجينه .. و السَّـوَاد اللي نكثره
شوكه بعْيونه
إجينه .. و الـمُحب يطلب
وصالك ما طلب أجره

ابـ"مِنىٰ" اترابك مُنىٰ روحي أحقَق
وأبلِغ الغايه
اِلْـطفوفـك "أزدِلفْ" وِاِبْـأربعينك
أمشي مشّايه
حضوري ابـ"عرَفه" عندي حضوري
ابـمجلس اِقْرايه
اْو أعيِّـد "عيد الأضحىٰ" ابيوم أضحّي
ابدمّي للرَّايه
أطوفك .. وابصحَن گبرك أكمِّل
سبعة أشواطي
أطوفك .. واسعى ويْ زينب
منِ اِلتَّـل واُوصل الشاطي
أطوفك .. يا ستار الكعبه
لاچن منهـتِـك سِتره

يكعبه ربنه والـرُكْـن اِليماني
مرقد أصحابك
إذا بيت الله ميزابه اِيْتـفايض
أصله ميزابك
اسْـتلامي للحَجَر لسْوَد أجيلك
واستلِم بابك
اْو سجُودي لله سبحانه او تعالىٰ
يِحله بعْتابك
أجيلك .. جَـيّـة الظامي اعله مايه
ابلهفه يتعنّه
أجيلك .. لاني خايف من جهنّم
لا ردت جَنّه
أجيلك .. عايف الدنّيا ورايه
او بس ردِت نظره

اعله حَجّـك كِل خَليجي او شامي
جاي او عايف اِدياره
واِجت عن الرّضا اِمْن ايران شيعه
ابهاي اِلزْياره
يجي خطّارك او شفنه العراقي
ايْحسبه خطّاره
من اِلبِـيـشه او تصِل للناصريّه
او كُوت واِعْماره
مواكب .. كلها نادت يا حُسين
ابـ صافي النيّه
مواكب .. حلِّه ، بغداد
او سِّماوه والدِّوانيَّه
مواكب .. سُفره وحده اِمْن النجف
ويْ سُفرة البصره

للشاعر : ميرزا عادل الاشكناني