ريت الزمن يندار (مكتوبة) - باسم الكربلائي

ريت الزمن يندار
يرجع هجوم الدار
رد الفعل معروف .. كلنه نصير سيوف .. بيد الصميده

سؤال امنه الصبه وياي
و اگوله بحسرة الحسره
هجوم الدار لو ينعاد
وإحنه ابهل زمن كثره
شنو ردة فعلنه تصير
عالهجموا على الزهره
وحگ الزهره نوگف سور
دون الباب والعتره
چان الاجو للباب
رجعو بلايه ارگاب
وأهل الخيانه تشوف
كلنه نصير سيوف
بيد الصميده

تگول الناس ساكت ليش
علي ومعروف ابو الحمله
رغم حق الدفاع يصير
وعليه القصه مو سهله
علي خايف على الآذان
سكت والسيف ما سلّم
وكلها تريد ابو سفيان
وچانت شيعته قله
خايف على الآذان
من مكر ابو سفيان
چان الأمر مكشوف
كلنه نصير سيوف
بيد الصميده

لوّن ذاك الزمان يعود
وهاي الشيعه موجوده
منهو اليگرب لداره
ومنهو يوصل حدوده
الوضع هاليوم يتحمل
ينطي الفتوه لجنوده
وجيش الرافضه منصور
اذا حيدر علي يقوده
لا ذاك يحرگ باب
والزهره ماتنصاب
ماتوصلها جفوف
كلنه نصير سيوف
بيد الصميده

علي كلما ذكرنه الباب
تسيل العين مدمعها
نگول الحرگ باب الله
لازم ايده نكطعها
بالله شلون لو شفناه
عليها الباب يدفعها
ويعصر فاطمه ونشوف
بيده النذل يصفعها
نهجم شبه زلزال
مثل الحشد لو صال
طير المنايه يطوف
كلنه نصير سيوف
بيد الصميده

واذا رادوا أدله نگول
هذا الواقع الأقرب
أجو احفادهم لينه
أو گالو كربله المطلب
ركضنه امغالب ويه الموت
غضب وجفوفنه تلهب
قلعنه بيا علي چم باب
وشطرنه راس چم مرحب
لو صحنه ياكرار
چن مالك وعمار
خلي الرگاب صفوف
كلنه نصير سيوف
بيد الصميده

لوّن الزهره تنخانه
ويرخصنه علي ويقبل
كم مليون شيصير ايثور
كم مليون سيف انسل
قميص الفتنه ما ينشال
ولا دار السقيفه اتظل
أو چان النصبوا رابع
گالو نعتذر أول
ونأذن ابصوتين
حيّ على السبطين
حدنه يصير احتوف
كلنه نصير سيوف
بيد الصميده

لجل عيناچ يا زهراء
ابد ما يغله كل غالي
لو تحت التراب نصير
لو حيدر يظل والي
شافونه اعله سوح الموت
من انصول منبالي
نزلت روسهم للگاع
راس الشيعه ظل عالي
لا مانطخ الراس
غيرتنه من عباس
فعل الزلم موصوف
كلنه نصير سيوف
بيد الصميده

 

للشاعر : عبد الخالق المحنه