يزهراء (مكتوبة) - باسم الكربلائي

 

 

يزهراء شيعوا جثتي الجليله
یزهراء مو نعش خیمة العقیله
یَمُ الحسن أقسم قسم لا مو نعش شالوا خِیَم
بیها السهم فوگ السهم آنه شریعه ابلا عَلَم
یزهراء یزهراء

یُمّه عفتیني الحسن بین البرایه
لیش جابوني الچ خیمة سبایه
لو صدگ هذا النعش نعش النهایه
لیش طلعت کربلا تلطم ورایه
آنه جیتچ خیمه بسهام الضحایه
إسمي مو بحر الکَرَم شاطي المنایه
موصوف بالبحر مشقوف بالگمر
معروف بالکَرَم یزهراء یزهراء

آنه عاشور و اجیتچ یالزچیه
و الدلیل بدمعتي دمعة رقیه
یُمّه من کثر السهام الناصبیه
البقیع بعیني أصبح غاضریه
حین حطوني نعش فوگ الوطیه
گمت أحِس ابخیلهم تسحگ علیّه
جُثمان عالأرض فِرسان من تِرِض
قُرآن من حِکَم یزهراء یزهراء

یُمّه یم جدّي النبي ما وَسّدوني
آنه جابوني سَبي ما شیّعوني
خاف بحبال الیِسِر ما گیّدوني
گیّدوا نعشي ابنبل لمّن رموني
لِأن شافوا کافلي و طف بعیوني
صوبوا نحوي السهام و صوبوني
یرمون بالنبل یردون أنجهل
یبقون بالوهم یزهراء یزهراء

لا تظنیني نعش وادم تشیعه
آنه شایل کل سهم و اگباله دمعه
هذا یذبح نحر عبدالله و یگطعه
هذا یعمي عیون عباس و یوگعه
هذا یُمّه الأبد ما أگدر أشلعه
هذا أخوي المن خرز ظَهره یطلعه
إسهام تجتمع آلام لو دمع
أیتام لو حَرَم یزهراء یزهراء

لاتشبگیني أذا ألقي سلامي
لِأن صرت حسین من کثرت سهامي
آنه أول کربلا و مشهد ختامي
و آنه آخر شام مخنوگه بکلامي
آنه نار بچبدتي و نار بخیامي
آنه بسهام و نبل رضّوا عظامي
مسموم من غدر محکوم بالصبر
مکتوم بالألم یزهراء یزهراء

یُمّه و الغدروچ ما خلص غدرهم
آنه عاشور المتت یُمّه ابصفرهم
الله لا یرحم علی الدنیا ذکرهم
والله یگطع کل نسل باقي بأثرهم
الضیّعوا گبرچ فلا یبقی گبرهم
باچر المهدي یواسیچ ابخبرهم
موعود من یِهِد مسنود بالحَشِد
و الزود لو هِجَم یزهراء یزهراء

 

للشاعر : صفاء الدفاعي الرميثي