مرت سنة ونص (مكتوبة) - باسم الكربلائي

مـرت سنة ونـص وانه بونينــي

يومية اموت ودمعي يحيينــي

بالشام چــم مرة انحفر گــبـري

چــم مرة مت وما خلص عمــري

عيني حسيني .. مرت سنة ونص من توادعنه
وادعي ابدمعي .. هلبت اموت والله يجمعنه
چِــنه چَنه .. روح اعله جسمين الله وزعنه
عِشنه ابعشنه .. مثل الحمام اودهري ضيعنه

ضليت اتاني يمته نتلاگــه ؟

اي والله والعـبـاس مشتــاگــه

عگـــبك يماي اعيوني لوتدري

چـــم مرة مت وماخلص عمري

مـرت سنة ونـص وانه بونينــي

يومية اموت ودمعي يحيينــي

بالشام چــم مرة انحفر گــبـري

چــم مرة مت وما خلص عمــري

جمري ابصدري .. عگـــبك يخي ماتنشد اشلوني !
حالي اشحالي! .. الذبحوك مرة عشرة ذبحوني
ميته يمته .. يوم آل أُمية فرجة سووني
هضمه زحمه .. ابحچــي الي ماينگــال سمعوني

ابعين الشماته الحادي خلاني

طولي يشوفه القاصي والداني

تدري يخويه امن انهتك ستري

چـــم مرة مت وماخلص عمري

مـرت سنة ونـص وانه بونينــي

يومية اموت ودمعي يحيينــي

بالشام چــم مرة انحفر گــبـري

چــم مرة مت وما خلص عمــري

موقف يكلف .. لو ردت اوصفه يگــصر الساني
ابعظمي ابجسمي .. كل كتر ذكرة لسوط عدواني
عندي ابلحدي .. ستةَ اشهود اعله الي طگـــاني
امتوني اعيوني .. چـــتفي وادية وخدي وآذاني

ابهاي السنة ونص وانه يومية

بالطيف اشوفن روحي مسبية

عفية اعله گــلبي ومانفذ صبري

چـــم مرة مت وماخلص عمري

مـرت سنة ونـص وانه بونينــي

يومية اموت ودمعي يحيينــي

بالشام چــم مرة انحفر گــبـري

چــم مرة مت وما خلص عمــري

حزني لني .. بالشام ميتة من گـــبل موتي
امشي نعشي .. ابهودج الناگـــة ايصير تابوتي
الحادي اينادي .. يله يزينب للقصر فوتي
كلفة وسفة .. مجبورة يطلع للزلم صوتي

ويزيد صاح ابصوته وتباها

اخت الگــمر مچـــتوفة جبناها

ولمن صبح بيد الزجر امري

چـــم مرة مت وماخلص عمري

مـرت سنة ونـص وانه بونينــي

يومية اموت ودمعي يحيينــي

بالشام چــم مرة انحفر گــبـري

چــم مرة مت وما خلص عمــري

ابدفني جفني .. مايغمض إلا بجية اخواني
خلهم كلهم .. ايشوفوني من صرت اني مو اني
شوگـي اعروگــي .. يبسن وحزني غير الواني
صدلي گــلي .. هم زينب انتي لوشخص ثاني!

ضيعني لمن شافني يحگـــله

هوه السبي من زينب اشخله!

ابصعدت الناگــة وبسلب خدري

چـــم مرة مت وماخلص عمري

مـرت سنة ونـص وانه بونينــي

يومية اموت ودمعي يحيينــي

بالشام چــم مرة انحفر گــبـري

چــم مرة مت وما خلص عمــري

جروحي ابروحي .. وانه ابسنة ونص شنسه شتذكر!
تدري ابفكري .. طف كربله يومية يتكرر
انعي ابسمعي .. طگـــت اضلوعك واهيه تتكسر
ابالي اگــبالي .. ثيابك المصبوغة ابدمه المنحر

من انظر قميصك شذكر وشنسه!

صوب الصدر مطبوع أثر رفسه

ابسيف الشمر لوتدري ياذخري

چـــم مرة مت وماخلص عمري

مـرت سنة ونـص وانه بونينــي

يومية اموت ودمعي يحيينــي

بالشام چــم مرة انحفر گــبـري

چــم مرة مت وما خلص عمــري

صعبة .. ابغربة .. بنت الحموله اتموت وحدهه
حيره .. ابديره .. البيهه انسبت وايصير مرقدهه
تنخه .. صرخه .. ومن الأهل محد حضر عدهه
خويه .. بويه .. لا أخو جاوبها ولا والدهه

گلبي ابمصابه والحزن ناده

ويلي اعله غربة عمة الساده

وآنـه اعله زينب منكسر ظهري

چـــم مرة مت وماخلص عمري

مـرت سنة ونـص وانه بونينــي

يومية اموت ودمعي يحيينــي

بالشام چــم مرة انحفر گــبـري

چــم مرة مت وما خلص عمــري

 

للشاعر: الميرزا عادل اشكناني