تاسع جرح (مكتوبة) - باسم الكربلائي

تاسِع جرِح للزهراء
هالليلَه ينزِف دمّه

تاسِع إمام اِعلَه السَّطِح جُثمانَه
وگلب الزّچيّه منكِسِر باحزانه
اتشُوف الجَواد اتخطّفت ألوانه
مرمِي اوْ نِحَل كِلّه وذاب
وابجِسمه يسرِي سِمّه

( أربَعَه اوْ عِشْرِين ) السِّنين اگصِيرَه
لاكنّه مُصحَف مُو سَهِل تَفسِيره
والّي قِرَه تارِيخَه صار ابحِيْره
عالِم عَظيم اوْ مهيُوب
وايْغذّي عالَم عِلمَه

فاطِمَه الليلَه حايِـرَه يا شيعَه
لابنِ الرِضا ابحِرگه احضَرَت تَشييعَه
هذا الإبِن واجِب صُبَح تَوديعَه
يوليدِي نادَت ويلاه
وابحَسرَه نَعشَه اتْكَلمَه

تاسِع إمام الليلَه يرحَل عَنها
والزهره يا يُوم الّي يسكِنْ وَنها
وهيّه بِدايَة كِل مُصيبَه مِنها
منْها الگلُب دُوم ايْنُوح
واعلَه الأهَل كل همّه

ليلَه اعله ليلَه اوْ ماهِجَع منها النُوح
والونّه منها چانت اتطلْعِ الرُوح
تِنعَه اعلَه مَسمُوم اوْ تِوِن لْـ مَذبُوح
دار الزمن بيها اهواي
والگلُب ميّت حِلمه

مِن فاجِعَه ولـ فاجِعَه اتْظَل اتدُور
باقِي ليالي اوْ يرجَع الها عاشُور
تتذكّر احسين الغَريب المنحُور
فوگ الرمُل جسم احسين
وابگلبَه نابِت سَهمَه

شِدُّو الحِزِم يا شِيْعَه واجْرُو الدَّمْعَه
باچِر ضِلِع ينْسِحِگ مِنِّ البَضْعَه !
بالطَّف الحْسين اوْ تِضِيگ الوَسْعَه
متطشّر اعله التربان
محّد إجاه اوْ لَمّه

 

للشاعر : حسين مردان البديري