ارباطعش عام (مكتوبة) - باسم الكربلائي
منذ ٩ أشهر١٥٥مشاهده|1
لطمية ارباطعش عام مكتوبة
الرادود باسم الكربلائي
أربـاطـعـش عـام عايش بالسجن
من عاف الاحباب ما عافه الحزن
عاش العمر بين جرحه اِوْ حسرته
آثــار الـدمـوع على امصلّايته
دم چفّه موجود لسّه ابسبحته
ياويلي و الگيد جارح رگبته
من شدّة الگيد ما غمّض جفن
من عاف الاحباب ما عافه الحزن
والله الحياطين لو عدهن سمع
چان امن الونين كادت تنشلع
رب السمه ايعين گلبه ابهالوضع
و امخضّر اتراب سجنه امن الدمع
كل ما يجي الليل يشتاگ اِوْ يحن
من عاف الاحباب ما عافه الحزن
سجّانه ما عاد يملك مرحمه
كل ساعه و ايروح يدفعه اِوْ يشتمه
و اهوايه أذّاه من سب فاطمه
و ابسطرة العين نزف دمع اِوْ دمه
أصل المحن هاي من كلمة و إن
من عاف الاحباب ما عافه الحزن
ما يعرف الليل من وجه الصبح
و الباب مسدود أبد ما ينفتح
كل جرح اليطيب يفز يمّه جرح
و الـدم بالگيود أثر ما ينمسح
من حگّه لو راد ينحب لو يون
من عاف الاحباب ما عافه الحزن
عگب المعاناة الأبد ما تنحمل
ياوسفه مسجون بالسم ينكتل
واليكظم الغيظ دمع عينه يهل
الما عنده أحباب صعب من يرتحل
و اتصب الدموع مثل صب المزن
من عاف الاحباب ما عافه الحزن
يالحظة الموت غريب اموادعه
لجنازته اتشيل حماميل اربعه
لا خلفه جنّاز لا واحد نعه
لا عنده دفّان يدفنه ابمضجعه
لا يمّه خوّان لا أب لا إبن
من عاف الاحباب ما عافه الحزن
و ابجسر بغداد ابن جعفر گضه
من ثگل الگيود ساگه امرضرضه
خل تفزع اتشيل نعشه الرافضه
مفجوعه و اتنوح ويّه ابنه الرضا
ينشال عالروس نعشه اِوْ يندفن
من عاف الاحباب ما عافه الحزن
للشاعر : كرار حيدر الخفاجي
التعلیقات