آخر فرض يم الخيم (مكتوبة) - باسم الكربلائي

آخر فرض يم الخيم صلاتي
طف كربله يعلن خبر وفاتي
عالمشرعه والله ردت مماتي
عالمشرعه والله ردت مماتي

تعرفتي كل الطايفه
بسبع الدجيل اتلقب
عمري مآتم للحزن
وابجي اعله عمتي زينب
واتصور آنا ابكربله
ضامي ودليلي يلهب
من اغرف الماي العذب
مثل الكمر ما اشرب

والي عطش ماي العذب يريده
بس الكمر عافه لجل عضيده

ناده فلا اشرب قبل أغاتي
عالمشرعه والله ردت مماتي

من زغري احلم بالنهر
والمشرعه والكافل
وارسم صور عن كربله
صورة قتيل وقاتل
وتنومس براعي العلم
واتنخه يا بوفاضل
لزيارته اكصد مشي
عمي الكمر يستاهل

يم النهر اكتب إلة قصيده
لجل الشرف عمي دفع وريده

هذا الامر بي خلصت حياتي
عالمشرعه والله ردت مماتي

بعيوني جم صورة طفل
شارد وزينب كهفه
وبكلبي جم خيمة اسعرت
نار بدمع ماتطفه
زينب لبو فاضل تصد
بس ما يجيها ابجفه
حبل السبي ياكل لحم
من الجفوف الترفه

مره كلت سوط الشمر نسيته
واعله المتن حافر نهر لكيته

ظهري انحنى واتوكأ ابعصاتي
عالمشرعه والله ردت مماتي

اوصل التلي الزينبي
ما كدر اوكف ع التل
اتصور الصاحت يخي
ميت عدل جيت اسأل
يبن امي لو باقي نفس
بس بلغ الي تكفل
كله العزيزه ميسره
يمها الشمر يتمرجل

من قررت ترجع بلا وليها
اتمنى لو ذاكه الوكت اجيها

وكت الزعل مثل الكمر صفاتي
عالمشرعه والله ردت مماتي

يا ما غدر بينه الدهر
والدنيه يا ما دارت
ماعدنه حرمه تنسبي
بس ويه زينب صارت
سبعين الف ضايع بخت
كلها اعله زينب غارت
ما حارت ابسوط السبي
بس ابسترها احتارت

ياحسرتي زينب بقت وحيده
يمها الشمر والمشرعه بعيده

يبست تره من العتب لهاتي
عالمشرعه والله ردت مماتي

طاري السبي لمن يمر
عاصف يطشر صبري
اتمنه يجويني الضمه
وسيف الشمر حز نحري
واتوزعت فوك الثره
داست الخيل ابصدري
اهون ولا زينب تون
وتنادي وصلوا خدري

اسمع طفل ينده يعم ولوني
وين المفر يا اباالفضل اجوني

ضامي انا ويجري عذب فراتي
عالمشرعه والله ردت مماتي

عمري بين الخيم
والمشرعه مشواره
واتمنه لو عندي صحن
يم الكمر ومناره
آني ضوه بصحره بلد
واتسمه راعي الشاره
مشهوده الي جاره آنا
للما إلة كل جاره

كلمن وصل بابي اخذ مراده
و لكل مرض بيتي صفه عياده

كم معجره ذكروا الي رواتي
عالمشرعه والله ردت مماتي

 

للشاعر : السيد عبدالخالق المحنة