ترحل (مكتوبة) - باسم الكربلائي

 

 

ترحل اوتترك مكانك خالي
رايح اِنته مدري رايح بالي

إذا باچر يجيني العيد ما أدري
 روحتي لو روحتي الگبري
غير انته المسافه امْن الهوه الصدري
شگلّ الروحي يا روحي البگه ابعمري
بويه شيْعوّض فراغ الغالي 
رايح اِنته مدري رايح بالي

جاي العيد بويه بس مشيت انته
امْن اشوف العيد أگولن ما ردت جيته
الفرح بس ودّعتني اوياك ودّعته
يبويه اخلاف عينك عمري ضيّعته
ودّعتني اوحزني ظل يبرالي
رايح اِنته مدري رايح بالي

البيت ابلا ابو مابي طعم گعده
يبويه افراگ وجهك محّد يسدّه
يراح اتروح بس ما بيك اثر رده
چنت وياك اخلّص العيد متعوده
ضيعتني يا چبير آمالي
رايح اِنته مدري رايح بالي

مو من طبعك اتخليني ضل وحدي
وكلمن عدها أبوها وانته ما عندي
الدمع لو ذكرياتك طاحن ابخدّي
اخلافك چنّي اشوفن كل فرح ضدّي
والفرح بعدك وَلا يحلالي
رايح اِنته مدري رايح بالي

چنت اتگلّي ماعوفچ ولا مرّه 
لاچن شو عفتني اوماتت العِشره
أوّل مره الاگي العيد منكسره
أي واعيوني من گدّ البچي حمره
يالعفتني اوفطّرت دلّالي 
رايح اِنته مدري رايح بالي

حرِت ما بين اودعك لو اموت آني 
اوحتى أوياك احضرلي نعش ثاني
چنت اتمنّه گبلك ميته تلگاني
اشْمحلاها يبويه اتصير دفّاني
يالعفتني اوما يطمّن حالي
رايح اِنته مدري رايح بالي

هيّه الدنيه بويه اخلافك اشبيها
البنت منهو اليحن غير الأبو اعليها
التفگد حظْن ابوها ايموتن ايْديها
الخيمه اطّيح بسّ ايموت راعيها
وآنه بس دمْع الحزن يصفالي
رايح اِنته مدري رايح بالي

 

للشاعر : محمد العقابي